UJANGILI KUATHIRI ZAIDI VIZAZI VIJAVYO AMESEMA SHOO

 

 

Na  Magreth  Magosso,  Arusha

KAIMU mkurugenzi Mkuu wa  shirika la Hifadhi la Taifa(TANAPA),Witness Shoo ametoa wito kwa wandishi wa habari nchini wathubutu  kuelimisha jamii juu ya madhara ya ujangili kwa wanyamapori sanjari na athari zake kwa lengo la kulinda aina za wanyama waishio katika hifadhi husika kwa vizazi vijavyo siku za usoni.

Akitoa kauli hiyo   jijini  Arusha  katika ofisi kuu ya Mamlaka hiyo Witness  Shoo alisema   hivi sasa hifadhi ya Arusha haina mnyama aina ya Faru kutokana na ujangili uliokithiri miaka ya nyuma ,huku akihofu kutoweka kwa jamii ya wanyama aina ya Tembo  kutokana na mauaji holela yanayoendelea katika hifadhi hiyo.

“Namini  karne nne zijazo  Taifa litabaki mufilisi kwa ujio wa watalii kutoka nchi za Ughaibuni kutokana na kutoweka kwa wanyama  adimu na changamoto ya mauaji ya Tembo yanayoshamiri kila kukicha katika hifadhi za wanyama,jamii ibadilike wandishi tusaidiane katika hili” alibainisha Shoo.

Msemaji wa Shirika la hifadhi Tanapa Paschal Shelutete  alisema  lengo la  kuwashirikisha wandishi wa habari  katika shughuli zao  ni moja ya jitihada kubwa kulenga shabaha ya umma kupata usahihi wa kubaini changamoto za hifadhi sanjari kuelimisha jamii zinazoishi karibu na hifadhi ziwajibike kulinda maliasili ya nchi ili vizazi vyote vinufaike na urithi wa rasilimali za Taifa.  

Naye Mkuu wa Idara ya ujirani mwema Pendaeli Shafuri alisema jamii zinazoishi karibu na hifadhi za Taifa hazina budi kutii sheria za misitu na wanyamapori kwa mujibu wa sheria ili kuepusha misuguano isiyo na tija kwa leo na kesho,huku akikiri ongezeko la jamii hizo ni chachu ya mgongano wa kuibiana mipaka na kudai chnagamoto hiyo inafanyiwa kazi kwa lengo la kuboresha mahusiano na vijiji .

Ofisa Utalii wa hifadhi hiyo Samweli Sakinoi akiri katika hifadhi za kaskazini zinakabiliwa na vitendo vya ujangili,ambapo hivi sasa  hifadhi ya Arusha inakabiliwa na ukosefu wa mnyama aina ya Faru,kutokana na jamii kutothamini,kuenzi uwepo wao,hali inayozorotesha shirikia kushindwa kufikia malengo yake kiuchumi hasa uboreshaji huduma za kijamii kwa vijiji jirani.