MIMBA ZAPUNGUA KWA WANAFUNZI MKOA WA MANYARA

 
Na Magreth Magosso, Kigoma.

TATIZO la ongezoko la mimba kwa wanafunzi wa shule ya sekondari Magala iliyopo kata ya Magala wilaya ya Babati Mkoa wa Manyara limepungua kwa kasi baada ya wanafunzi hao kupata msaada wa ujenzi wa bweni la wasichana.

Akizungumzia hilo Matroni wa shule hiyo Stella Ezekieli alisema baada kupata ufadhili wa ujenzi wa bweni la wasichana kutoka mamlaka ya hifadhi ya manyara  changamoto ya wanafunzi kupata mimba imetoweka katika shule hiyo ambapo awali ilikuwa ni tatizo kubwa kwa wanafunzi wa shule kupata mimba na kufukuzwa shule.

Alisema kuwa kipindi cha awali kila mwaka walikuwa wanawafukuza wanafunzi zaidi ya sita kutokana na kuwa na mimba wakati wakiwa shule jambo ambalo ni kosa kisheria mwanafunzi kuwa na mimba wakati akiwa shule.

“Wanafunzi wa kata hii wanapanga katika majumba ya watu na wengine wanatoka mbali hadi kufika shule tatizo hili limechangia kwa kiwango kikubwa cha wanafunzi kupata mimba, ambapo tangu wanafunzi walipoanza kuishi katika mabweni tatizo hilo halipo kabisa” alisema mwalimu Stella.

Alisema bweni hilo linauwezo wa kuchukua wanafunzi 80 ambapo kwa sasa wapo 64 ambapo kipaumbele kimetolewa kwa wale wanaoishi maeneo ya mbali na shule lengo ni usalama mzuri wasichana na wanatimiza malengo yao.

Aidha aliomba pia mabweni ya watoto wa kiume yaweze  kujengwa ili nao wawe katika usalama wa maisha yao wakati wa kuja shule ambapo eneo kubwa limezungukwa na msitu wa hifadhi na kunawanyama wengi wenye madhara kama simba.

Wakitoa shukurani zao wanafunzi hao Ruth Paulo na Osiana Thadei walisema ufadhili huo wa bweni imesaidia kupunguza adha walizokuwa wanazipata wakati wa kufika shule kwa kuhofia wanyama wakali pamoja na kujaa kwa mto magala kuwa chanzo cha wao kutozingatia taratibu za kufika shule kila siku.

“Tangu kuanza kwa bweni hata masomo yamekuwa mepesi kwa kuwa tunapata ushirikiano na walimu kutuelekeza pale ambapo hatujaelewa vizuri lakini pia tatizo la mimba nalo limekwisha kwa wanafunzi na kuomba msaada huo uendelee kwa ujenzi wa mabweni ya wavulana nao” walisema wanafunzi hao.

Aidha mhifadhi wa ujirani mwema hifadhi ya Manyara Ibrahimu Minga alisema lengo la kujenga bweni hilo ni kuweka usalama wa wasichana ambapo ujenzi huo ulifuatia maombi ya wakazi wa eneo hilo katika vipaumbele vyao vya kijiji.

Alisema ujenzi huo umegharimu zaidi ya milioni 116 ambapo wananchi  walishiriki  kuchangia nguvu zao ili jamii inufaike na  maendeleo  yatokanayo na mapato ya utalii wa n je na ndani.