MAJAMBAZI WACHARUKA ENEO LA MACHIMBO YA DHAHABU SIKONGE

Na  Allan Ntana, Sikonge

AFISA mtendaji ya kata ya Kitunda, wilayani Sikonge, mkoani Tabora, Julius Ndege, amenusurika kuuawa na watu wanaosadikiwa kuwa majambazi baada ya kumkosakosa kwa kumfyatulia risasi kuelekea kwenye gari yake.

Akielezea mkasa huo, afisa mtendaji huyo, alisema makasa huo ulimtokea wiki hii, siku ya jumatatu ya tarehe 25 machi, majira ya saa nane mchana, wakati akitokea Kitunda kuja Sikonge mjini akiwa na familia yake.

Ndege alisema akiwa na gari yake yenye namba za usajili  T 189 BAG aina ya RAV 4, alipofika eneo linalojulikana kama “mtaji wa masikini” ghafla aliona watu watatu wenye makoti makubwa walioficha nyuso zao na sura za bandia wakitokea msituni kuelekea eneo la barabara.

Alisema mmoja kati yao alikuwa na silaha aina ya SMG, mmoja akiwa na jiwe kubwa na mwingine akiwa hana kitu chochote walijitokeza barabarani ghafla na yule mwenye silaha akachuchumaa chini na kuanza kufyatua risasi mbili mfululilizo akilenga tairi za gari, huku mwingine akiwa anasukuma jiwe kubwa kufunga barabara.

Kufuatia hali hiyo mtendaji alisema alijifanya kama anasimama na wao walipozubaa alikanyaga mafuta na kufanikiwa kuwatoroka, lakini wakati amefanikiwa kuwatoroka majambazi hao walifyatua risasi nyingine ambayo ilikwenda kuharibu rejeta ambayo ilianza kuvuja maji.

Ndege alisema alijikongoja na kufanikiwa kufika katika kijiji cha Mabangwe ambapo aliomba msaada wa maji kwa wananchi na kuweka kwenye rejeta, kisha akafanikiwa kutoa taarifa kituo cha polisi wilaya ya Sikonge kwa njia ya simu.

Aidha mtendaji huyo alisema kwenye gari yake alikuwa na mkewe aitwaye Vailet Jumanne, mtendaji wa kijiji cha Mwenge Shaban Swed, motto wake Janet Julius mwenye umri wa mwaka mmoja na nusuu na watu wengine wawili ambao alikuwa amewapa lifti.

Mtendaji huyo ametoa wito kwa uongozi wa wilaya na polisi kuweka utaratibu wa askari kusindikiza mabasi ya abiria hasa yale yaendayo mbeya kwani hali ya utekaji nyara magari ya abiria na ya mizigo huenda ukarudia tena na kuongeza kuwa  hali hiyo itasaidia kupunguza uharifu hasa ikizingatiwa kuwa kata ya Kitunda kwa sasa kuna machimbo ya madini ya dhahabu na kuna watu zaidi ya 3,000 kwa sasa hapo machimboni.

Aidha alisema alifika mjini Sikonge majira ya saa 11:05 jioni na alifika kituo cha polisi na kutoa taarifa hiyo na askari walianza safari kuelekea eneo la tukio.

Kamanda wa polisi mkoa wa Tabora amesema ametuma askari kupitia kituo cha polisi Sikonge kwenda kufanya doria kwenye eneo la tukio na hata kwenye machimbo kama kuna watu wanajihusisha na matukio ya utekaji na ujambazi.