HUU NI UNYAMA WA KUTISHA IRINGA , KIBAKA ACHOMWA MOTO AKITUHUMIWA KUIBA PAMPU YA TSH 25,000

mwili  wa  kijana Paul Raphael  Mtekele ukiwa umefunikwa baada ya  kuteketezwa kwa  moto na  wananchi  wenye hasira kali baada ya kutuhumiwa kuiba pampu ya  kupulizia dawa mazao ya shilingi 25,000 katika  kitongoji cha Tosamaganga  B wilaya ya Iringa vijijini  usiku wa  leo (Tunaomba  radhi kwa  picha  hizi)

WANANCHI  wanaosadfikika  kuwa na hasira  kali  wakazi  wa  njiapanda ya  Tosamanganga  wilaya ya Iringa  vijijini mkoani Iringa wamemuua kwa  kichapo mtuhumiwa wa wizi kijijini hapo Paul Raphael Mtekele na mwili  wake  kuuchoma  moto baada ya kijana  huyo  kuvamia  nyumba  zaidi ya  mbili kijijini hapo na kuiba mali mbali mbali  ikiwemo pampu ya  kunyunyuzia  dawa mazao  yenye  thamani ya Tsh 25,000

Tukio  hilo  la kinyama  limetokea majira ya saa 9 usiku  wa kuamkia  leo katika kitongoji  cha Kipanga  B katika  kijiji  cha Njiapanda ya  Tosamanganga  wilaya ya  Iringa  vijijini jimbo la Kalenga .

Wakizungumza na mtandao huu  wa  www.francisgodwin.blogspot.com leo  eneo la tukio  wananchi  wa  eneo  hilo akiwemo Juma Mwakawago ambae  pia katibu  wa  huduma  za jamii  kijiji  hicho cha  Tosamaganga  amesema kuwa katika  kijiji  hicho  kumekuwepo na matukio mbali mbali ya uharifu na  watu kuibiwa mali  na  wanaodaiwa  kufanya  hivyo ni pamoja na marehemu huyo na  kundi lake.

Hata  hivyo  kijana  huyo kabla ya  kuuwawa alikiri  kujihusisha na matukio mbali mbali ya wizi kijijini hapo pamoja na kuwachomea nyumba  wakazi wa eneo hilo na maeneo mengine pale  wanapokosa kupata mali  walizozifuata kwa ajili ya kuiba .

Pia alidai  lengo lao kwa  siku ya jana ni kwenda  kuiba eneo la Ilula katika moja kati ya maduka ya mji  huo wa Ilula  ila   wenzake  waliopanga nao  walichelewa  kumfuata na  hivyo yeye  kuamua kufanya shughuli hiyo kijijini hapo na kuomba kusamehewa . 

Alisema  kuwa  mbali ya matukio mbali mbali ya uharifu kujitokeza katika  kijiji  hicho  ila usiku  wa jana  nyumba  mbili za  wakazi  wa kitongoji  cha Kipanga B   zilivamiwa na  wezi hao na kuporwa mali na kupelekea  wananchi  kufanya msako  uliopelekea  kumkamata  kijana  huyo akiwa katika harakati  za  kuvunja mlango  wa nyumba  ya mkazi mmoja  wa kijiji hicho na baada ya  kubanwa  ndipo alipokwenda  kuonyesha pampu hiyo iliyoibwa usiku  huo.

Hata  hivyo  alisema  kuwa  baada ya  kipigo  kikali  kijana  huyo ambae sasa ni marehemu  alilazimika  kutoa orodha  ndefu ya  vijana  ambao  wamekuwa  wakishirikiana katika uharifu ,orodha ambayo  imehifadhiwa na wakati  wowote  kijiji kitaendesha  msako  wa  kukamata mmoja baada ya mwingine.

Mmoja kati ya  wazazi katika  eneo hilo Delophina  Mtavilalo ambae  pia ni mwenyekiti  wa CCM wilaya ya Iringa  vijijini  alisema  kuwa  vitendo vya  wizi katika  kijiji  hicho  vimezidi na kuwa mbali ya  wizi  bado  wanawake  wamekuwa  wakibakwa na kupokonywa mali  zao .

Hivyo  alisema  tukio la kijana  huyo kuuwawa mbali ya kuwa  linasikitisha ila bado linapaswa  kuchukuliwa  tahadhari  kubwa kwa vijana  wanaoendelea  kufanya  shughuli za wizi  na kuwataka  vijana  kuachana na shughuli hizo na badala yake  kujiunga katika  vikundi vya kiuchumi .

Mwenyekiti  huyo wa CCM wilaya  aliwataka  pia  wananchi  kuacha  kujichukulia  sheria mkononi kwa  kuwaua watuhumiwa wa uharifu na badala yake mara  baada ya  kuwakamata  wahakikishe wanawafikisha mbele ya  vyombo vya sheria  kwa hatua  zaidi badala ya  kuwaua kinyama kama hivyo.

Akithibitisha  kutokea kwa tukio  hilo mwenyekiti  wa  serikali ya  kijiji  cha Njia panda ya Tosamaganga  Dominic Ndenga  alisema  kuwa kijana   huyo alikuwemo katika orodha ya  vijana  wanaojihusisha na vitendo  vya wizi katika  kijiji  hicho.

Mwenyekiti huyo alisema  kuwa  tayari  kijiji  kimefikisha  taarifa  kwa mkuu  wa polisi  wilaya ya Iringa (OCD) kumjulisha  juu ya vitendo vya wizi katika kijiji hicho  pamoja na unywaji  wa  pombe  kupita kiasi ambapo  wananchi  wamekuwa  wakishinda katika  pombe  usiku  kuja na kuwa  kuanzia sasa  dawa  yao inachemka .

Pia  alisema orodha ya  majina ya  wizi  iliyotajwa na marehemu  huyo itafanyiwa kazi mara  moja ili kuhakikisha  mtandao wa  uharifu katika kijiji  hicho unakomeshwa na kuahidi  kufufua ulinzi  wa kijadi ( sungusungu )

Baba  wa  kijana  aliyeuwawa mzee Raphael Mtekele alisema  kuwa  kijana wake alikuwa akituhumiwa  kuhusika na  vitendo vya wizi mara kwa mara  na kupelekea  kuhama kijijini hapo na kuhamia  eneo la Ipogolo katika Manispaa ya Iringa na kuwa  ni  juzi tu ndipo aliporejea  kijijini hapo na usiku  wa  leo  kuuwawa .

Hivyo  kuwataka  wazazi  kuendelea  kuwaonya  watoto  wao kuachana na matukio ya wizi na kuwa iwapo  watawatetea  yaliyomkuta mtoto  wake  huyo pia yatawakuta