RAIS KIKWETE KUANZA ZIARA MKOANI TABORA LEO

Na Hastin Liumba, Tabora

RAIS wa Jamhuri ya Muungano wa Tanzania, Dkt. Jakaya Mrisho Kikwete,jumapili, anaanza ziara ya siku 5 mkoani hapa,kukagua shughuli mbalimbali za maendeleo ikiwa ni pamoja na kuongea na wananchi.

 

Akitangaza ujio huo kwa waandishi wa habari, mkuu wa mkoa wa Tabora, Fatma Mwassa, alisema kuwa rais atawasili siku ya Jumapili mkoani Tabora, akitokea mkoani Singida na ziara yake itaanzia wilayani Igunga, ambapo atapokea taarifa ya mkoa na ya wilaya hiyo.

 

Mwassa aliongeza kuwa mheshimiwa Rais akiwa wilayani humo ataweka jiwe la msingi kwenye ujenzi wa daraja la Mbutu na kufungua ‘Chujio la Maji-Bulenya’ na baadaye atafanya mkutano wa hadhara mjini Igunga kabla ya kuelekea Nzega.

 

Akiwa wilayani Nzega, Rais Kikwete ataongea na wananchi katika mkutano wa hadhara na baadae jioni atapokea taarifa ya maendeleo ya wilaya hiyo, na siku inayofuata ataelekea Puge kuweka jiwe la msingi katika ujenzi wa barabara ya Nzega- Tabora kabla ya kuelekea wilayani Uyui.

 

Aidha Mwassa aliongeza kuwa akiwa wilayani Uyui, Rais Kikwete mbali na kupokea taarifa ya maendeleo pia  ataweka jiwe la msingi katika ujenzi wa barabara ya Tabora-Ndono na Tabora-Manyoni kupitia Nyahua na kisha kuongea na wananchi katika mkutano wa hadhara kabla ya kuondoka kuelekea Tabora mjini.

 

Katika ziara hiyo, Rais Kikwete pia atazitembelea wilaya za Urambo, Kaliua na Sikonge ambapo atapokea taarifa za maendeleo kwa kila wilaya sambamba na kukagua shughuli mbalimbali za miradi ya maendeleo pamoja na kuongea na wananchi..

 

Akiwa wilayani Urambo na Kaliua, Rais Kikwete ataweka jiwe la msingi katika ujenzi wa barabara ya Ndono – Urambo na kuzindua shule ya sekondari Kaliua.

 

Mwassa alibainisha kuwa miradi mingine itakayozinduliwa katika ziara hiyo ya Rais ni pamoja na kuweka jiwe la msingi katika mradi wa Uboreshaji huduma za Maji-Igombe na kuweka jiwe la msingi katika ujenzi wa uwanja wa ndege wa Tabora ambao upo katika hatua za mwisho kukamilika.

 

Aidha, Mwassa amewataka wananchi wote kujitokeza kwa wingi kumpokea Rais, kila atakapopita, kuanzia mwanzo wa ziara yake mpaka hapo atakapoondoka,  kwani hii ni bahati ya kipekee kutembelewa na mkuu wa nchi mwanzoni mwa mwaka mpya.

 

‘‘Naamini ujio wake una baraka za kipekee kwa mkoa wetu wa Tabora’ kwa sababu ni mtu anayesikiliza kilio cha wananchi wake’’, aliongeza Mwassa