MWENYEKITI WA HALMASHAURI UYUI AUAWA KWA RISASI..."Kamanda wa Polisi Tabora asema uchunguzi wa awali ni mauaji ya kisasi cha Fedha"

JUMA  MOHAMMED :Mkazi wa Magili wilayani Uyui akiwa hospitalini hajitambui muda mfupi mara baada ya kufikishwa katika hospitali ya mkoa wa Tabora Kitete kufuatia tukio la kuvamiwa na  majambazi nyumbani kwake saa saba usiku ambapo alijeruhiwa vibaya maeneo mbalimbali ya mwili wake.

ACP ANTHONY RUTHA:Kamanda wa Polisi mkoa wa Tabora  akiwa ofisi kuu ya Jeshi la Polisi mkoa wa Tabora.

Kamanda wa Polisi mkoa wa Tabora ACP Anthony Rutha akizungumza na baadhi ya waandishi wa habari mkoa Tabora kufuatia mauaji ya aliyekuwa Mwenyekiti wa halmashauri ya wilaya ya Uyui mkoani Tabora Bw.Mashaka Kaliyuwa ambaye pia ni diwani wa kata ya Miyenze.

MAUAJI
Watu ambao hawajaweza kufahamika mara moja wamemuua kwa kumpiga risasi Mwenyekiti wa halmashauri ya wilaya ya Uyui Bw.Mashaka Kaliyuwa majira ya saa saba  usiku akiwa nyumbani kwake Ipuli manispaa ya Tabora.

Kamanda wa  Polisi mkoa wa Tabora ACP Anthony Rutha,amethibitisha kutokea kwa tukio hilo ambalo amedai kuwa uchunguzi wa awali umeonesha kuwa ni tukio linalohusishwa na masuala ya kisasi ingawa bado jeshi la Polisi linaendelea na uchunguzi.

Alisema kutokana na maelezo waliyoyapata toka eneo la tukio,wauaji hao walivamia nyumbani kwa mwenyekiti huyo wakiwa na bunduki ambapo kabla ya kuingia ndani walifyatua risasi hewani na baadaye kuingia ndani ambako walitekeleza mauaji hayo kwa kumpiga risasi tumboni Mwenyekiti huyo ambaye kwa sasa ni marehemu.

Akifafanua zaidi wakati akiongea na waandishi wa habari wanaofuatilia tukio hilo la kuhuzunisha,Kamanda Rutha alisema mbali na kumpiga risasi Mwenyekiti huyo wauaji hao pia walimjeruhi kwa kumkata panga  kichwani walipokuwa wakimwamuru kutoa fedha walizodai kuwa ni mali yao.

"Kwakweli tukio hili hatuwezi kusema kuwa ni majambazi kwani hapo nyumbani kwake marehemu kuna vitu vingi vya thamani lakini hawakuvichua na kisha walipokuwa wakidai hizo fedha zao pia walimwambia marehemu kuwa ni lazima wamuue"alisema kamanda Rutha.

Hata hivyo mauaji hayo pia yameendelea kuzua minong'ono ya hapa na pale yakihusisha wadhifa aliokuwa akiutumikia ingawa hakuna anayethibitisha ukweli hadi sasa.