"VIONGOZI CCM MSIOGOPE MATUSI YA WAPINZANI" PROFESA KAPUYA

Mbunge wa Jimbo la Urambo Magharibi wilayani Kaliua Profesa Juma Athumani Kapuya akifurahia na wana CCM katika kilele cha sherehe za miaka 38 ya kuzaliwa CCM.

Mbunge wa Jimbo la Urambo Magharibi wilayani Kaliua Profesa Juma Athumani Kapuya akitembelea   ujenzi wa maabara katika shule ya sekondari Usinge  katika kilele cha sherehe za miaka 38 ya kuzaliwa CCM (picha na Allan Mtana)

Na Allan Ntana, Kaliua

VIONGOZI wa Chama Cha Mapinduzi wametakiwa kutoogopa matusi na kashfa zinazotolewa kwenye majukwa ya kisiasa na viongozi wa vyama vya upinzani kwa kuwa matusi hayo ni kichocheo cha kuifagilia CCM na hamasa ya kuongeza jitihada zaidi za kuwatumikia wananchi.

Hayo yalibainishwa juzi na Mbunge wa jimbo la Urambo Magharibi ambayo ni wilaya mpya ya Kaliua mkoani Tabora Profesa Juma Athumani Kapuya katika kilele cha sherehe za miaka 38 ya kuzaliwa kwa CCM zilizofanyika katika kata ya Usinge na kuhudhuriwa na umati mkubwa wa watu.

Kapuya aliwataka wana CCM na viongozi wote wa chama hicho kutoogopa misukosuko ya aina yoyote ile na maneno ya kashfa na matusi yanayosemwa majukwani dhidi yao na wapinzani kwani wanawafagilia tu na kuwajenga zaidi kisiasa ili waendelee kuwatumika wananchi kwa ari mpya, kasi mpya na nguvu mpya.

Alisema CCM iliyoasisiwa na Baba wa taifa hayati Mwalimu Julius Kambarage Nyerere imejijengea misingi mizuri ya kuwatumikia wananchi wake ndio maana imekuwa na mikakati mingi ya kuhakikisha huduma za kijamii zinaboreshwa sambamba na kuimarisha mapambano dhidi ya maadui wa maendeleo ikiwemo ujinga, maradhi na umaskini vita aliyoanza Baba wa Taifa akawaachia waiendeleze.

‘Ndugu zangu CCM imefanya kazi kubwa sana ya kuwaletea maendeleo wananchi, msishabikie tu maneno ya hao ndugu zetu wasiopenda amani na wasioitakia mema nchi yetu angalieni shule za msingi na sekondari zilivyoongezeka, angalieni wingi wa vyuo vikuu, zahanati, vituo vya afya, barabara za lami na kasi kubwa ya kusambaza umeme hadi vijijini inayoendelea sasa’, alisema.

Alieleza kuwa CCM na serikali yake hawapaswi kuanza kulumbana na hao wapinzani wala kuwaona kwamba hawafai kwani hao ni wenzetu tulikuwa nao na tukiendelea kuwaletea maendeleo watarudi tu sie hatuna ugomvi nao, chama chetu kinaamini kuwa binadamu wote ni sawa, tutajenga barabara, shule, vituo vya afya, zahanati na vyuo vikuu, kwa ajili ya Watanzania wote na wao wakiwemo.

Aidha alieleza kuwa kitendo cha serikali ya CCM kuendelea kukaa madarakani kwa mda mrefu tofauti na vyama vingine vya ukombozi Barani Afrika kinatokana na misingi mizuri na mshikamano uliopo baina ya viongozi na wanachama wake, jambo ambalo ni tofauti kwa vyama vilivyo vingi ikiwemo hivi vilivyoko hapa nchini.

Akizungumzia hali ya kisiasa ndani ya wilaya hiyo Profesa Kapuya alisema wananchi wengi bado wanaipenda CCM kwani ushindi wa viti 44 kati ya 71 waliopata wagombea wa CCM ambao ni sawa na asilimia 78 dhidi ya viti 27 sawa na asilimia 23 walivyopata wapinzani ni ishara tosha ya kukubalika.

Aidha alisema chama chake kuendelea kukubalika wilayani humo ni kwa sababu kina dira ya maendeleo na mshikamano mzuri wa wanachama na viongozi na ni mkombozi wa kweli kwa wananchi wa wilaya hiyo kinachotakiwa ni kushikamana vizuri na wananchi ili wazidi kuwaunga mkono.

Akitoa maoni yake juu ya suala la wizi wa pesa za escrow, Profesa aliwataka viongozi wa serikali na mashirika kuacha tamaa ya mali na utajiri wa haraka haraka kwani itawamaliza kisiasa au kuharibu mtiririko mzima wa maisha yao ikiwemo kufilisiwa.

Aidha alisema vitendo vya wizi wa mali ya umma na ufisadi vinavyofanywa na viongozi wa serikali vinachochewa na tamaa ya mali na utajiri na kwa kiasi kikubwa vina changiwa na kuporomoka kwa maadili ya viongozi sambamba na matumizi mabaya ya teknolojia ambapo alishauri kuwepo na udhibiti wa teknolojia inayotumika katika mitandao ya kifedha.

Na kwa biashara haramu ya madawa ya kulevya inayofanywa na wananchi wa rika tofauti wakiwemo viongozi wakubwa alisema kuwa inachangiwa na malezi mabaya ya wazazi na kuporomoka kwa maadili ya viongozi.

Ili kukomesha tabia za wizi wa mali ya umma kwa viongozi wa serikali Profesa Kapuya alishauri Chama Cha Mapinduzi ambacho ndicho kimeshika dola kusimamia ipasavyo suala la uadilifu kwa watendaji wake sambamba na kuwachukuliwa hatua kali wale wote wanaobainika kujihusisha na vitendo hivyo.

Akizungumzia katiba inayopendekezwa Profesa Kapuya aliitaka jamii kuiunga mkono kwa sababu imeelezea mambo yote ya msingi yanayogusa na kutetea maslahi ya makundi yote ya kijamii na imezingatia hali ya kila Mtanzania huku akiwataka wote wanaoshawishi wananchi waikatae kuacha tabia hiyo kwani haina maslahi kwa taifa.