MWANAMKE AVUNJWA MIFUPA YA MIKONO KISA AGOMA KUTOA UNYUMBA- KIGOMA

Na Magreth Magosso, Kigoma

 

MWANAMKE  mmoja  mkazi  wa  Sigunga  Kitongoji  cha  Kawibiri Wilaya  ya Uvinza,  Mkoani  Kigoma   Jasmin  Kassim  amelazimika kufanyiwa  upasuaji  wa kuunga  mifupa   ya mikono yote miwili katika  Hospitali ya misheni ya Heri iliyopo  wilayani kasulu  ,baada  ya  kujeruhiwa vibaya  kwa  upanga na mumewe  kufuatia madai ya  kukaidi   kutoa unyumba.

 

Akisimulia kisa mkasa Jasmini alisema ,mnamo Octoba,29 ,2014 majira  ya  saa 4.00 usiku baada ya kumaliza kula chakula , alikwenda chumbani kulala ndipo mume wake akaingia ndani na kumtaka wafanye tendo la ndoa  jambo ambalo hakuwa tayari kufanya hivyo kutokana na kuchoshwa na kazi alizokuwa akifanya mchana mzima  wa siku hiyo.

 

“Baada ya kumkatalia  alitoka nje na alirudi akiwa ameshika upanga  ghafla akaanza kunipiga  na kisha  kunikata mikono  yote  miwili  kuja kuzinduka nikajikuta nipo zahanati ya kijijini,nikashonwa nyuzi zaidi ya tano ” alisema Jasmin.

 

Octoba ,30,mwaka huu  mwanamke  huyo  Jasmini alihamishiwa katika hospitali ya Rufaa ya Maweni iliyopo Manispaa ya kigoma Ujiji ambapo alilazwa  na kufanyiwa uchunguzi  wa kina ikagundulika mifupa ya mikono imeachana na hivyo kushonwa kwa mara ya pili ili kusaidia mifupa  kurudi kwenye hali yake.

 

“Nashukuru leo naongea shida bado  ipo katika mifupa ,ndio haijaungana hivyo nasubiria nikiwa sijui ni lini mikono yangu itarudi kama zamani” aliongeza Jasmin.

 

Nae Muuguzi wa Zamu wa Wodi ya Kina mama Upande wa Majeraha na Wajawazito ,Yovita Lushemeze , alisema kuwa Jasmin  alipofikishwa hospitali hapo hali yake ilikuwa mbaya kwani alikuwa na majeraha mikono yote miwili baada ya kukatwa mapanga.

 

“mifupa ilifikiwa  na panga na kukatika ila mikono haikukatika moja kwa moja na madonda yalishughulikiwa na yanapona, bado mfupa  haijaunga inashughulikiwa” alisema Lushemeze.

 

Alisema   jana aliruhusiwa akafanyiwe  taratibu za matibabu zaidi wa upasuaji na wataalamu waliopo katika hospitali ya Heri Misheni ,ambao wao watasaidia kuunga mishipa iliyojeruhiwa vibaya.

 

 

  Kamanda wa Polisi mkoani  Kigoma , Jafari Mohamed alisema  bado hajapata taarifa kuhusiana na tukio hilo na kuwasihi  wanawake walio katika ndoa wawajibike katika hilo kama mandiko ya dini zao, si vyema kukaidi agano.

 

 Ukosefu wa mawasialiano na boti la kisasa  inachangia wahanga wa matukio ya ukatili wa kijinsia kushindwa kusaidiwa kwa haraka,ambapo Mkuu wa dawati la jinsia la Polisi Amina Kihando akiri  tangu huduma zianze rasmi 2007 hawajafika kwa wakazi wa mwambao wa Ziwa Tanganyika .

 

Hivyo,inachangia washindwe kupata takwimu sahihi za matukio ya ukatili wa kijinsia  mkoani  na kusihi wadau wa masuala hayo TAMWA,TGNP,TAWLA na wengineo waweke  mawakala  washirikiane  kubaini matukio   ya aina hiyo kwa lengo la kupunguza vitendo viovu.