WATOTO WANAUZWA KWA SHILINGI ELFU SABINI KIGOMA

 

Na Magreth Magosso,Kigoma

 

SINTOFAHAMU  ya  elimu ya ukatili wa kijinsia kwa watoto wadogo unaochangiwa  na ugumu wa maisha katika Mkoa wa Kigoma,imepelekea baadhi ya wazazi  kuwauza watoto wenye miaka 13 hadi 14 ,kwa  ujira wa malipo sh.70,000 kwa Mwaka  kwa Jamii ya wafugaji waliovamia pori la hifadhi  lililopo katika kata  ya Kagerankanda Tarafa ya Katoto  wilayani kasulu.

 

Akifafanua hilo kwenye kikao cha madiwani  kilichofanyika hivi karibuni  kasulu mjini , Diwani wa kata ya kasulu mjini Izack Mkemwema alisema wameligundua hilo katika operesheni ya kutathimini uhalisia wa jamii ya wafugaji ambao wameingia kinyemela katika mapori mbalimbali wilayani humo hasa pori la kagerankanda.

 

“hali mbaya  biashara ya binadamu inaendlea katika jamii zetu ,wazazi wanauza watoto kwa ujira wa shilingi 70,000 kwa mwaka, ikiwa ni malipo ya kuchunga ng`ombe ,ambapo kisheria ni kosa biashara ya binadamu lakini ipo na inatendeka kwa wakazi wetu “ alibainisha Mkemwema.

 

Diwani wa kata ya kagerankanda Joel Simon alisema hali hiyo inachangiwa na hali ngumu ya maisha katika familia husika sambamba na jamii kushindwa kuwajibika,kujitambua na uthubutu wa kukabiliana na changamoto za maisha sambamba na watoto hukubali kutumiwa vibaya baada ya kukaidi kusoma.

 

Mwenyekiti wa Halmashauri ya kasulu William Luturi  alisema ili kubaini  wahanga hao halmashauri kupitia wataalamu na watendaji wa eneo husika watafanya uhakiki   wa watoto waliouzwa katika kaya za wafugaji wasio rasmi kwa maslai ya kuweka ulinzi na kulinda haki za watoto husika na sheria itachukua mkondo wake .

 

Luturi  alisema walezi wameacha majukumu yao kwa familia zao hali inayochangia watoto kuacha masomo katika shule walizokuwa wakisoma ,badala yake hujiingiza katika ajira zenye ukiukwaji wa haki za watoto kwa mujibu  sheria  mbalimbali zinazobainisha kulinda haki na ulinzi kwa watoto na kuwasihi jamii watoe tarifa katika idara husika ili kustawisha taifa na wilaya husika.

 

Kwa upande wa Mratibu wa asasi ya kusaidia watoto waishio katika mazingira magumu ( KIOO)  ya  hapa Edward Simon  alibainisha kuwa,walezi wanashindwa kuwajibika kwa familia zao kikamilifu hali inayochangia watoto kutumikishwa kazi ngumu na ujira mdogo ambao unalisha kaya husika .

 

Mkuu wa Dawati la jinsia kigoma Amina Kihando akiri watoto  ni wahanga wa ajira haramu ikiwemo ya kuuza miili  hali inayochangiwa na elimu duni miongoni mwa jamii hasa kwa mikoa iliyopo pembezoni mwa nchi inatokana na  ukata unaochangia Dawati hilo , kushindwa kutoa elimu ya ukatili wa kijinsia na athari zake na namna ya kupunguza vitendo hivyo ili kuthibiti maadili mema.