MADEREVA WAZEMBE WA MALORI WAHATARISHA WANYAMA HIFADHI ZA TARANGIRE

 

Na Magreth Magosso, Babati.

WITO umetolewa kwa madereva wa vyombo vya  moto vya usafiri  wa Barabarani kuwa makini na matumizi  bora ya barabara hasa  maeneo ya  mapito ya wanyama , ili kuepusha vifo vyao  kwa kuwagonga na magari na hivyo kuhatarisha kutoweka kwa baadhi ya wanyama kwenye  hifadhi za taifa.

 

Akithibitisha  kauli hiyo Mhifadhi wa Ekolojia hifadhi ya Tarangire Abel Peter alisema  wanyama wapo hatarini kutoweka, kutokana tabia ya baadhi ya  madereva  hasa wa malori makubwa  kutozingatia sheria za usalama barabarani na kusababisha vifo vya wanyama  pindi wavukapo ng`ambo ya pili ya barabara ya babati-manyara.

 

“Wanyama aina ya Fisi miraba, chui, Simba hasa jamii ya paka na mbwa mwitu  wapo hatarini kutoweka kutokana na vifo vitokanavyo na ajali ukizingatia wapo wachache na uzao wao ni wapolepole” alifafanua David Maige ambaye ni mhifadhi utalii.

 

Tabia  ya mwendo kasi inachangia serikali na shirika la hifadhi kutoboresha miundombinu ya barabara kwa kiwango cha lami zilizo karibu na hifadhi kwa kuhofia ongezeko la vifo vya wanyama wanaohamahama  hupoteza maisha katika vivuko vyao.

 

 Takwimu zinaonyesha idadi ya wanyama aina ya Simba wamepungua kutoka 400 katika kipindi cha mwaka 1990 hadi kufikia 120 kwa mwaka 2013/2014ambapo inachangiwa na sababu mbalimbali ikiwemo jamii kuwauwa pamoja na ajali za barabarani.

 

 Hata hivyo hifadhi imejipanga kukabiliana na changamoto mbalimbali ikiwa ni pamoja na kuelimisha jamii, kushiriki maonyesho, kushirikiana na waandishi wa habari kutoka kwenye maeneo mbalimbali ili kutangaza na kufichua uhalifu uliopo katika hifadhi jambo litakalosaidia kutatua changamoto hizo.