MBUNGE SIKONGE ALINYOOSHEA KIDOLE JESHI LA POLISI,SUNGUSUNGU

Na Hastin Liumba,Sikonge

MBUNGE wa jimbo la Sikonge,mkoani Tabora,Said Nkumba amelinyooshea kidole jeshi la polisi wilayani humo kwa madai limekuwa likiwambikizia kesi wananchi.

Alitoa kauli hiyo hivi karibuni kwenye mkutano wa hadhara uliofanyika kwenye viwanja vya CCM wilayani humo.

Nkumba alisema asingependa kugombana na watendaji wa serikali ama vyombo vya ulinzi na usalama ama polisi kwani kero ambazo zmekuwa akipokea kama mbunge toka kwa wananchi ni malalamiko ya kubambikwa kesi na polisi.

“Wapo polisi ambao si waaminifu na wamekuwa wakijihusisha na matendo ya rushwa,kubambika wananchi kesi na mara nyingine wamekuwa hawatoi dhamana kituoni hadi watuhumiwa watoe kitu kidogo.”alisema Nkumba.

Alisema ifikie mahali wananchi washirikiane na polisi kwenye ulinzi shrikishi lakini sasa hivi wananchi wanaishi kwa uadui na baadhi ya askari polisi hapa Sikonge.

Alisema pamoja na malalamiko hayo bado vijana wenye kufanya kazi ya bodaboda nao wamekuwa wakilalamikia sana matendo ya askari polisi ama trafiki kuomba rushwa bila kufanya makosa yoyote.

Katika hatua nyingine mbunge huyo aliliomba jeshi la Sungusungu lipewe elimu kuhusiana majukumu yao kwani mara kadhaa wamekuwa wakikengeuka namna ya kufanya kazi zao na kukuta wakivunja sheria.

Baadhi ya wananchi waliozungumza na mtandao huu walisema wamefikia mahali sasa watakuwa wakichukua sheria mkononi kwani wahalifu wakikamatwa wamekuwa wakiachiwa polisi na kuja uraiani kuwatishia.

“Tumechoshwa sana na hali hii tutachukua maamuzi yetu…..hata huo ulinzi shirikishi kwa sasa hatutaki tumechoshwa.

Kamanda wa jeshi la polisi mkoani Tabora Peter Ouma alisema hana taarifa hizo lakini wapo wananchi ambao wanakuwa si wakweli.

“Hivi mfano wananchi wanapiga kura ya kutuhumu mtu kuwa jambazi hapo kabambikwa kesi…..waje kwake walete ushahidi wa kubabikizwa kesi hizo atashughulikia mara moja.” Alisema.