MADIWANI URAMBO WAPITISHA BAJETI YA MAENDELEO BIL 39.9

Na Allan Ntana, Urambo

BARAZA la madiwani la halmashauri ya wilaya ya Urambo limepitisha bajeti ya maendeleo kwa mwaka 2013/2014 kiasi cha sh. bilioni 39.9 ambayo imeweka kipaumbele zaidi katika utekelezaji wa miradi ya maendeleo.

Katika bajeti hiyo, halmashauri ya wilaya ya Urambo imepanga kuboresha na kutekeleza miradi mbalimbali ya maendeleo iliyoanishwa katika idara zake zote ikiwemo idara ya elimu ya msingi na sekondari, afya, maendeleo ya jamii, maji, utawala na idara ya ujenzi. Miradi yote itatekelezwa katika wilaya zote mbili za Urambo na Kaliua.

Baadhi ya miradi iliyopewa kipaumbele katika bajeti hiyo ni matengenezo ya barabara na madaraja, ujenzi wa vyumba vya madarasa, nyumba za waalimu, mabweni ya wasichana, kuongeza matundu ya vyoo, ujenzi wa zahanati, vituo vya afya na wodi za watoto.

Miradi mingine ni kukamilisha ujenzi wa kituo kikuu cha mabasi mjini Urambo, kukamilisha ujenzi wa ofisi ya mtendaji kata ya Songambele, jengo la utawala la wilaya ya Kaliua na nyumba ya mkuu wa wilaya na kuimarisha utoaji elimu ya huduma za afya ya uzazi, VVU na UKIMWI na stadi za maisha kwa  vijana.

Akizungumza katika kikao cha baraza hilo wakati akiwasilisha makadirio ya bajeti ya wilaya hiyo kwa mwaka 2013/2014, mkurugenzi mtendaji wa halmashauri hiyo, Mhandisi Richard Ruyango, alisema kuwa halmashauri imelenga kukusanya jumla ya sh. 39,909,472,300.00 ambapo kiasi cha sh. 4,189,755,000.00 kitatokana na vyanzo vya mapato ya ndani.

Mhandisi Ruyango alibainisha kuwa katika bajeti hiyo kiasi cha sh. 25,233,686,300.00 ni ruzuku kutoka serikali kuu kwa ajili ya mishahara na matumizi mengineyo na sh.10,073,335,000 ni kwa ajili ya miradi ya maendeleo inayogharamiwa na fedha toka serikali kuu na kiasi kilichobaki sh. 412,696,000.00 ni fedha za hisani kutoka kwa mashirika na taasisi mbalimbali.

Akifafanua makadirio ya  kiasi cha ruzuku kitakachotolewa na serikali kuu na michango mbalimbali inayotegemewa kutoka kwa wahisani, mhandisi Ruyango alieleza kuwa wanatarajia kupokea fedha kama ifuatavyo; mishahara sh.22,443,997,300, matumizi mengineyo sh. 2,789,689,000, miradi ya maendeleo sh. 10,073,335,000, na wafadhiri sh. 412,696,000.

Aidha, akizungumzia matumizi ya fedha itakayopatikana kutokana na vyanzo vya mapato yake ya ndani, mhandisi Ruyango alisema kuwa wanatarajia kutumia mapato hayo kama ifuatavyo; mishahara sh.304,467,200, matumizi mengineyo sh.1,643,410,400 na miradi ya maendeleo sh. 2,241,877,400.   

Aidha Mkurugenzi huyo alibainisha kuwa bajeti ya mwaka huu imeongezeka kidogo ikilinganishwa na bajeti ya mwaka jana ambapo halmashauri ililenga kukusanya kiasi cha sh. bilioni 29.3 toka vyanzo vyake vya mapato ya ndani na ruzuku ya serikali na hadi kufikia mwezi februari mwaka huu halmashauri iliweza kukusanya jumla ya sh. billion 14.3.

Mhandisi Ruyango aliongeza kuwa katika bajeti hiyo ya mwaka jana halmashauri ililenga kutumia kiasi cha sh. bilioni 29.3 kutoka katika makusanyo yake yote lakini hadi kufikia mwezi februari mwaka huu halmashuri iliweza kutumia kiasi cha sh. bilioni 10.8 tu ikijumuisha fedha za bajeti timilizi.

Akizungumzia jitihada za kuimarisha ukusanyaji wa mapato ya ndani, mhandisi Ruyango alisema kuwa halmashauri hiyo itaendelea kuongeza nguvu zaidi katika ukusanyaji wa mapato yatokanayo na vyanzo vyake vya ndani ili kuongeza ufanisi katika utekelezaji wa miradi mbalimbali ya maendeleo katika halmashauiri hiyo.