AUAWA KWA KUCHOMWA KISU,POLISI TABORA WAMSAKA MUUAJI

  Na Beatrice  Masaki-Tabora

Mtu mmoja aliyefahamika kwa jina la Majija Kasubi (38) mkazi wa Mirambo kata ya mbugani ameuawa  kwa kuchomwa kisu maeneo ya Mwanza road mjini Tabora.

Akithibitisha kutokea kwa tukio hilo kamanda wa Polisi mkoa wa Tabora ACP Athony Rutha alisema tukio hilo limetokea  majira ya saa nane usiku wa tarehe 22 januari mwaka  huu ambapo Bw. Majija alikuwa akinywa pombe za kienyeji  na ndipo alipochomwa kisu na mtu mmoja kwenye paji la uso na tumboni jambo ambalo lilisababisha kifo chake baadae wakati akipatiwa matibabu baada ya kufikishwa hospitali ya mkoa wa Tabora Kitete.

Kamanda Rutha amemtaja mtuhumiwa wa  mauaji hayo kuwa ni Joseph Maiko ambae alitoka gerezani kwa msamaha wa Raisi desemba 9 mwaka jana  nakuongeza kuwa mtuhumiwa huyo ni mharifu mzoefu kwani  tangu mwaka  2003 alikuwa na kesi mbalimbali zilizokuwa zinamkabili na baada ya kufanya mauaji hayo alitoroka.

Hata hivyo aliendelea kusema kuwa mtuhumiwa huyo bado hajakamatwa na upelelezi unaendelea  ili kujua chanzo cha mauaji hayo na kuwataka wananchi kutoa ushirikiano kwa jeshi la polisi ili kuweza kumkamata mtuhumiwa huyo.