WATATU MBARONI KWA MAUAJI YA MWANAFUNZI CHUO CHA CBE

Na Juma Kapipi Tabora

Jeshi la Polisi mkoani Tabora linawashikilia watu watatu akiwemo mganga wa kienyeji kwa tuhuma za kufanya jaribio la kumtolea ujauzito na kusababisha kifo chake mwanafunzi wa Chuo cha biashara CBE Dodoma kilichotokea mkoani Tabora.

Kamanda wa Polisi mkoa wa Tabora ACP Anthony Rutha amethibitisha kutokea kwa tukio hilo mnamo tarehe 6 Novemba 2012 majira ya saa 12 na dakika 57 jioni baada ya mwanafunzi huyo aliyejulikana kwa jina la Jesca Rafael kufikishwa katika Hospitali ya mkoa wa Tabora Kitete akiwa mahututi kutokana na jaribio hilo la kutolewa ujauzito ambapo muda mfupi baadae alifariki dunia.

 

Akizungumza na gazeti hili ofisini kwake kamanda Rutha alisema uchunguzi wa awali umebaini kuwa marehemu Jesca ambaye ni mwanafunzi wa CBE Dodoma alikuja Tabora akiwa na Martin John(24)ambaye ni mwanafunzi mwenzake waliokuwa wakiishi wote Dodoma wakiwa wamepanga chumba kimoja kama wapenzi na hata kufikia hatua ya marehemu kupata ujauzito hali iliyosababisha kutafuta namna ya kuutoa ujauzito huo.

 

KUTAFUTWA KWA MAREHEMU HUKO DODOMA

Baada ya wazazi kukosa mawasiliano baina yao na marehemu Jesca waliamua kumtafuta chuoni CBE Dodoma ndipo wakagundua binti yao hakuwepo chuoni,wakaamua kutoa taarifa Polisi Dodoma na uchunguzi wa kina ulianza ikiwemo kuhoji baadhi ya wanachuo ambao walikuwa wakiishi na kuwa na ukaribu na marehemu.

 

Aidha katika mahojiano na Polisi ilibainika kuwa marehemu Jesca alikuwa mjamzito aliopewa na Martin John na kwamba mnamo tarehe 4/10/2012 wanachuo hao walipanda basi kuja Tabora kwa dada yake na Martin kutafuta mganga wa kienyeji aliyefahamika kwa jina la Mahadhi Razaro(40) kwa ajili ya kutekeleza kwa siri zoezi la kuutoa ujauzito huo.

 

TABORA.

Siku chache mara baada ya kufika  Tabora na kupata ufumbuzi wa adha hiyo iliyokuwa ikiwakabili wanachuo hao wawili, jaribio la utoaji ujauzito lililongozwa na mganga huyo wa kienyeji ambaye ni mwenyeji wa Kigoma kwa kusimamiwa na Martini John  na dada yake Ritha John ambaye ndiye mwenyeji wao,majira ya saa kumi na mbili jioni marehemu Jesca alizidiwa na kulazimika kupelekwa Hospitali ya mkoa wa Tabora Kitete ambapo walimkuta muuguzi wa zamu aitwaye Charles Christopher(37).

 

MAELEZO YA MUUGUZI.

Kwa mujibu wa maelezo ya muuguzi huyo Charles Christopher,marehemu aliletwa hospitalini hapo na wanaume wawili na mwanamke mmoja akiwa mahututi ambapo waliandikisha jina la mgonjwa  Prisca Rwakatare badala ya Jesca Raphael  huku dada wa Martini John akijitambulisha kwa jina la Maria Rwakatare kama msimamizi wa mgonjwa huyo waliyemleta.

 

Muuguzi huyo wakati akiendelea kumpima mgonjwa aligundua kuwa tayari alikuwa amekwisha poteza maisha na alipotoka nje kuwaangalia waliomleta yaani Ritha,Martin na Mganga huyo wa kienyeji maarufu Dr.Mahadhi tayari walikwisha toweka na kumtelekeza waliyemleta ambaye kwa wakati huo sasa alikuwa amekwisha fariki dunia.

 

Hata hivyo baada ya mwili wa marehemu kukosa ndugu wa kuuchukua ulilazimika kuhifadhiwa katika chumba cha maiti hospitalini hapo na baadaye idara ya afya halmashauri ya manispaa ya Tabora  kwa kushirikiana na hospitali ya mkoa wa Tabora Kitete waliamua kufanya mazishi.

 

Kwaupande wa jeshi la Polisi kwa kushirikiana na baba wa marehemu Jesca kwa kibali cha mahakama,mwili wa Jesca ulifukuliwa na kurudishwa tena chumba cha kuhifadhia maiti cha hospitali ya Kitete kwa ajili ya uchunguzi wa kina na kubaini waliohusika na tukio hilo Martini John,Ritha John na huyo mganga wa kienyeji Mahadhi Razaro ambao kwa sasa wanashiliwa na Polisi.