WANAWAKE WALAZIMIKA KULALA CHINI BAADA YA KUJIFUNGUA KWA KUKOSA VITANDA-KIGOMA

Na Magreth Magosso,Kigoma

WANAWAKE  wajawazito katika kijiji cha Nyanganga wilaya ya Uvinza Mkoa wa Kigoma ,wanalazimika kulala chini baada ya kujifungua kwa kukosa vitanda vya kupumzika katika zahanati ya nyanganga.

 

Hali hiyo inatokana na uwepo wa kitanda kimoja cha mbao ambacho ni chakavu ambapo huwalazimika kuwalaza vichanga wanaozaliwa kwa siku hiyo.

 

Akizungumza na Jamboleo katika zahanati hiyo Muguzi wa hapo Mwatatu Mustafa akiri wazazi hutandika kanga chini baada ya kujifungua kutokana na ukosefu wa vitanda na magodoro ,ambapo tangu mwaka 2009 alikuta hali hiyo na kitanda kilichopo hutumia kuwalaza watoto.

 

“wanawake wa huku wanazaa ,ambapo kwa siku napokea vichanga watano hadi sita,inabidi walale chini ili watoto walale kwenye kigodolo hiki kama unavyokiona ,  nipo mimi na mganga tu,tunashirikiana na wakunga wa jadi  kuwangalia wazazi,hitaji la haraka ni magodoro matano na vitanda pia” alibainisha Mustafa.

 

Aidha alisema shida ni mganga wa kituo hicho kushindwa kufika katika vikao vya kijiji ili kubainisha adha ya uhaba wa vitanda sanjari na kuvuja kwa nyumba za wauguzi hao,ambapo hulazimika kuweka beseni vitandani  pindi inyeshapo mvua.

 

Kwa upande wa wazazi waliokutwa hapo Eliza Julias na Meri Dafidel kwa nyakati tofauti wakili kulala chini na kwa siku zaidi ya wajawazito watano hujifungua na ili kulinda afya za watoto hulazimika kuwalaza watoto katika kitanda kimoja kilichopo na kutandika khanga zao chini ili wapate kusinzia na uchovu wa kujifungua.

 

Baadhi ya wakunga wa jadi waliokutwa hapo Zainabu Ntabindi na Catalina Paulo waliongeza kwa kusema mbali na kulala  chini ,zahanati haina chumba cha kupumzikia walengwa sanjari na ,Serikali ya wilaya kushindwa kutimiza  motisha ya doti moja ya kanga,sabuni na sukari kwa wakunga wa jadi wanaosaidia uzazi salama kwa mama na mtoto.

 

Hivyo,Katibu Itikadi na Uenezi  wa  chama  cha  NRA  Taifa Hamis Kiswaga alitoa godoro tatu ,shuka mbili na vitanda vitatu ili kupunguza adha husika na kumtaka Mbunge wa Jimbo la kigoma kusini David Kafulila atimize ahadi yake ya vitanda 100 alivyoahidi mwaka 2010 akiwa ana tija ya kuendelea kuwa mbunge jimboni mwake .