GOFU LA KIONGOZI WA WAJERUMANI LA MWAKA 1905

Gofu la nyumba iliyokuwa makazi ya kiongozi wa Wajerumani waliokuwa wakilima zao la mpira kuanzia mwaka wa 1905.Imedaiwa Wajerumani hao walikuja nyang'anywa makazi hayo na Waingereza.Makazi hayo endapo yatafanyiwa ukarabati na kutangazwa kikamilifu,yatavutia watalii wa ndani  na nje ya nchi na hivyo kuiingizia kipato kikubwa halmashauri ya Mkalama.

Mti aina ya mbuyu uliopo kwenye yaliyokuwa makazi ya Wajerumani mwanzoni mwa miaka ya 1900 ambao ulitumika kunyongea watuhumiwa waliokuwa wakitiwa hatiani.Picha zote na  Nathaniel Limu.

Jengo lililotumiwa na Wajerumani kama mapokezi  kuanzia mwaka 1905 huko katika kijiji cha Mkalama wilaya ya Mkalama.Jengo hilo baadae Waingereza waligeuza matumizi na kuwa posta.

Na Nathaniel Limu -Mkalama

HALMASHAURI  ya wilaya ya Mkalama  Mkoa wa Singida, imeshauriwa kuzingatia uwezekano wa kulikarabati na kulilinda  jengo lililojengwa na Wajerumani mwaka 1905 lililopo katika kijiji cha Mkalama, ili liwe makumbusho kwa kizazi cha sasa na kile kijacho pia liwe  kivutio kwa watalii wa ndani na nje ya nchi.

Ushauri huo umetolewa  juzi na mkazi wa kijiji hicho Joseph Kidimanda, wakati akizungumza  na mwandishi wa habari hii aliyetembelea jengo hilo lililoanza kujengwa  na Wajerumani mwaka 1905 na kuanza kutumika mwaka 1910.

Alisema aina ya ujenzi uliotumika kujenga jengo la makazi kiongozi wa Wajerumani  hao, likiwa pamoja na jengo ya mapokezi, mahakama  chumba cha kuhifadhia (mahabusu) wafungwa na lile la utawala, ni wa kipekee, tofauti kabisa na  ujenzi unaofanyika hivi sasa.

Kidimanda alisema katika makazi hayo, pia upo mti aina ya mbuyu, uliokuwa ukitumika kunyongea watuhumiwa wa makosa mbalimbali  waliokuwa wanapewa adhabu ya kunyongwa hadi kufa.

“Makazi haya ya Wajerumani ambayo baadaye walinyang’anywa na Waingereza, yamejengwa juu ya mlima uliopo kwenye  kijiji chetu. Kwa ujumla yanavutia mno. Kama yatakarabatiwa na kulindwa, kwa vyo vyote yatakuwa chanzo kikubwa sana cha mapato ya halmashauri yetu”,alisema Kidimanda.

Aidha,aliweza kutoa ushauri mwingine kwa kushauri kuwa halmashauri inaweza kutafuta  mwekezaji akajenga hoteli yenye ubora kwenye yaliyokuwa makazi ya Wajerumani,itavutia   watalii wa ndani kufika  mahali hapo ili  kuona majengo yaliyojengwa miaka 110 iliyopita.

Kwa mujibu wa Kidimanda , Wajerumani hao walikuwa wanajishughulisha zaidi na kilimo na ilikuwa ni kosa kubwa kwa mtu ye yote kwenda kinyume na matakwa yao.

Anasema baada ya kunyonga hadi kufa watu wengi kwenye mbuyu uliopo kwenye makazi yao, na kubaini kuwa bado baadhi ya watu waliendelea na tabia ya kutokutii maelekezo yao bila kuogopa adhabu hiyo, walianza kunyonga watu kwenye mbuyu uliopo kwenye uwazi kijijini hapo, ili kila mtu aweze kushuhudia kwa lengo la kuwaogofya.