HUKUMU KESI YA MWANDISHI WA MWANANCHI DESEMBA 10

Mwandishi wa habari wa gazeti la The Citizen na Mwananchi mkoani Singida,Awila Silla, alipokuwa wodini katika hospitali ya mkoa mjini Singida Septemba 9 mwaka 2013, baada ya kucharangwa mapanga na kisha kuporwa mali mbalimbali zikiwemo simu mbili za kiganjani.(Picha na Nathaniel Limu).

Na Nathaniel Limu, Singida

KESI ya unyang’anyi wa kutumia silaha dhidi ya mwandishi wa habari wa magazeti ya MWANANCHI na THE CITIZEN mkoani Singida, inayomkabil Adamu Abdallah mkazi wa Utemini mjini Singida, inatarajiwa kutolewa hukumu yake Desemba 10 mwaka huu.

Mwandishi wa habari, aliyecharangwa mapanga na kisha kunyang’anywa mali mbalimbali ikiweno simu mbili za kiganjani, ni Awila Silla mkazi wa Utemini mjini Singida.

Kesi hiyo no.240/2013 ipo chini ya hakimu mfawidhi mwandamizi wa mahakama ya hakimu mkazi mjini Singida, Joyce Minde.

Minde amesema kuwa ushahidi wa pande zote mbili ambazo ni upande wa  jamhuri na ule wa utetezi, umeishakamilisha utoaji wa ushahidi na hivyo umefungwa.

Inadaiwa kwamba Septemba nane mwaka 2013 saa mbili usiku huko maeneo ya Utemini jirani na mahakama ya mwanzo Utemini, mshitakiwa Adamu alimvamia mwandishi wa habari Awila,na kumshambulia kwa panga sehemu za usoni na kumsababishia maumivu makali yaliyopelekea kulazwa katika hospitali ya mkoa mjini hapa.

Amedaiwa lengo la mshitakiwa Adamu kumshambulia Awila, ni kumtisha na kumdhoofisha ili aweze kutekeleza azma yake bila ya matatizo yo yote, ambapo alifanikiwa kunyang’anya mali mbalimbali na simu mbili moja ikiwa ni ya aina ya ‘airtel pink.

Pamoja na mshitakiwa Adam, mshitakiwa namba mbili Muksin Abubakari mkulima na mkazi wa kijiji cha Kinyeto manispaa ya Singida,ambaye anashitakiwa kwa kosa la kupatikana na mali ya wizi (simu ya kiganjani mali ya Awila Silla aina ya airtel pink),hukumu yake inatarajiwa kutolewa desemba 10 mwaka huu.