SERIKALI YASHINDWA KUTIMIZA LENGO UTALII WA NDANI

 

Na Magreth  Magosso, Babati

IMEELEZWA kuwa moja kati ya changamoto zinazokwamisha malengo ya kuongeza utalii wa ndani inatokana na gharama kubwa za usafiri wa kuwafikisha watalii maeneo mbalimbali ya hifadhi za Taifa ikilinganishwa na hali halisi ya vipato vyao na hivyo kushindwa kumudu gharama za utalii wa ndani kwa baadhi ya wananchi waliowengi.

Kauli hiyo imetolewa na Mhifadhi utalii wa hifadhi ya Tarangire  David Maige ambaye aliwaeleza Waandishi wa habari kutoka mkoani Kigoma waliotembelea hifadhi hiyo ambapo aliweka bayana kuwa hali duni inayosababishwa na kipato kidogo kwa wananchi wanaoishi maeneo jirani hifadhi hiyo imekuwa kikwazo kikubwa cha kushindwa kutembelea na kujionea vivutio  mbalimbali vya utalii vilivyomo ndani ya hifadhi.

 

Alisema ili kufikia lengo la kuongeza utalii wa ndani  Serikali inapaswa  kuangalia namna ya kutatua tatizo la usafiri kwa kupunguza kiwango cha kodi ya ushuru kwa magari binafsi ili yaweze kutoa huduma nafuu kwa wananchi walio tayari kutembelea hifadhi, licha ya Shirika  la hifadhi ya Taifa kutatua changamoto ya maeneo ya malazi ya wageni kulingana na kipato cha wananchi.

 

“Gharama zipo juu , kwa siku mtalii anatakiwa kutoa kiasi cha shilingi laki tatu, na utalii wa hifadhi ya Tarangire sehemu kubwa ni hutumia gari kutokana na wanyama wakali waliopo ndani ya hifadhi  ni vyema wananchi  waje kwa vikundi ili kumudu gharama za usafiri” alisema Maige

 

 Naye Kaimu mhifadhi mkuu wa hifadhi hiyo  Upendo Massawe alisema takwimu zinaonyesha kuwa kuanzia mwaka 2010/2011 waliotembelea hifadhi walikuwa 43,181 huku mwaka 2012/2013  watalii 65,038 walitembelea hifadhi ambapo idadi hiyo ni chache ukilinganisha na wakazi wanaoishi katika mkoa wa Arusha na mikoa jilani.

 

Aidha imebainika kuwa, hifadhi nyingi nchini zinakabiliwa na changamoto ya  janga la ujangili, uvamizi wa mapito ya wanyama, ongezeko la idadi ya watu katika vijiji vinavyozunguuka hifadhi na kusababisha kusongeza ndani mipaka ya hifadhi, uharibifu wa vyanzo vya maji na mazingira kwa ujumla.

Kutokana na changamoto hizo jamii inatakiwa kukubali kutumia elimu inayotolewa na shirika hilo kwa kuleta mabadiliko chanya ya kutunza na kuhifadhi mazingira na wanyama kwa kushirikiana na shirika hilo kwa kuwadhibiti wale wanaohusika kukiuka taratibu, kanuni na sheria, sambamba na Serikali kuangalia upya ongezeko la watu katika maeneo ya hifadhi.