WATETEZI WA HAKI ZA BINADAMU NCHINI WAPEWA SOMO

Na Nasra Abdallah,Dar-es-salaam

 

MTANDAO wa Chama cha Watetezi wa Kutetea watu wanaojishughulisha na Utetezi wa Haki za Binadamu (THRD-Coalition) umewataka watetezi kushirikiana kimakundi katika kufanya kazi hizo pale wanapoona mazingira yao ya usalama yapo hatarini.

 

Wito huo ulitolewa na Mratibu wa Kitaifa wa THRD-Coalition, Onesmo Olengurumwa, katika warsha ya siku tatu iliyoanza jana jijini Dar es Salaam kwa ajili ya kuwajengea uwezo na mbinu mbalimbali za kufanya kazi zao kwa umakini bila kupata matatizo.

 

Olengurumwa alisema ushirikiano huo utawafanya kuwa na nguvu zaidi na usalama tofauti na mtu anapokuwa mmoja mmoja.

 

Kwa mujibu wa Olengurumwa ni mazingira hayo hatarishi ndiyo yamefanya kuundwa kwa mtandao huo kwa kuwa ukweli ni kwamba watetezi hawana wa kuwatetea kama ilivyo kwa makundi mengine.

 

Alisema mafunzo hayo yatawajengea mbinu za namna gani ya kukabiliana na mazingira ya kufanya kazi na kutolea mfano sakata lililomkuta Dk. Stephen Ulimboka na baadhi ya waandishi wa habari mkoani Iringa.

 

“Ni vizuru watetezi tukafahamu kwamba kuna baadhi ya watu hawapendi kazi zetu, hivyo ni vyema tukajijengea mazingira mazuri kuona tunaishi kwa usalama,” alisema mratibu huyo.

 

Kuhusu changamoto, Olengurumwa alisema kutokana na mfumo wa uendeshwaji wa serikali wamejikuta wakifanya kazi katika mazingira magumu.

 

Pia aliwaasa watetezi kuwa na msimamo, kwa madai kwamba kuna baadhi yao wanachanganya suala la utetezi na mambo ya siasa jambo ambalo hawataweza kufanya kazi zao vilivyo.

 

Mhadhiri Mstaafu wa Chuo Kikuu cha Dar es Salaam, Azavel Lwaitama, alipongeza hatua ya kuanzishwa kwa mtandao huo ambao alidai Kenya uliwasaidia baadhi ya maafisa kutoka Tume ya Uchaguzi ya nchini hiyo kutoroka ili kuepuka kudhuriwa kipindi cha uchaguzi wao.

 

Kwa mujibu wa Lwaitama mafunzo hayo yatawawezesha washiriki kujua namna gani ya kutunza hata siri zao walizozihifadhi katika kompyuta zao, picha kwenye kamera, na mawasiliano ya kwenye simu.

 

Mtandao wa THRD-Coalition unajumuisha watu mbalimbali ikiwemo waandishi wa habari, wanaharakati kutoka mashirikia mbalimbali, ambapo umeanzishwa tangu mwaka 2010 na upo chini ya Kituo cha Sheria na Haki za Binadamu.