RAIS WA LIBERIA AWATAKA VIONGOZI NCHI ZA AFRIKA KUTENGA RASILIMALI ZA KUTOSHA KUPAMBANA NA MALARIA

Rais Jakaya Kikwete akiongea na vyombo vya habari leo mara baada ya kufungua rasmi ofisi za Ofisi za  Umoja  wa Viongozi wa Afrika  wa Kudhibiti Malaria(ALMA) iliyopo katika Kituo cha Mkakati wa Kupambana na Malaria(Ceemi), jijini Dares Salaam akishirikiana na mgeni wake Rais wa Liberia Ellen Sirleaf Johnson leo.

 NA MAGRETH KINABO – MAELEZO

RAIS wa Liberia, Ellen  John-son Sirleaf amewataka viongozi wa  nchi za Afrika kufanya jitihada za kuhakikisha wanatenga rasilimali za kutosha za  kuweza kupambana na ugonjwa wa Malaria ili   ifikapo mwaka 2015 Bara la Afrika lifanikiwe kutokomeza ugonjwa huo kwa asilimia sifuri.

Kauli hiyo ilitolewa leo na Rais  huyo wakati  wa sherehe za uzinduzi wa Ofisi za  Umoja  wa Viongozi wa Afrika  wa Kudhibiti Malaria(ALMA) iliyopo katika Kituo cha Mkakati wa Kupambana na Malaria(Ceemi), jijini Dares Salaam.

Alisema lengo kubwa la ALMA ni kuhakikisha kuwa ifikapo mwaka 2015 Bara la Afrika linaondokana  na ugonjwa huo ikiwemo  vifo vinavyosababishwa na  Malaria .

“Tunaweza kufanya hivyo ili tuweza kufanya tunatakiwa kuchukua hatua  za kuwa na rasilimali za kutosha na kuzitawanya katika vituo vya afya kama ilivyo katika azimio letu la Abuja.” Alisema Rais Hellen.

Aliongeza kuwa  jitihada  hizo zitafanikiwa kwa kuboresha usimamizi bora  wa mfumo wa  fedha ili kuweza kukabiliana na tatizo la uhaba wa fedha kiasi cha   dola za Marekani  bilioni  3.2 .

  “ Tunatakiwa kuboresha mifumo yetu ya fedha ili kuwezesha upatikanaji wa vifaa vya kupambana na ugonjwa wa Malaria  mfano  dawa na  utoaji wa vyandarua bure, utafiti na kuwa wabunifu wa kutafuta njia za kukabiliana na uhaba wa fedha ili tuweze kutimiza lengo la kuwa na asilimia zero ya Malaria  ifikapo mwaka 2015. ” alisisitiza.

Rais huyo, ambaye pia ni Mwenyekiti wa ALMA alisema baadhi ya nchi zimefanikiwa kutimiza lengo hilo la Abuja, ambazo ni Msumbiji, Togo na Rwanda.

Aliongeza kuwa bara hilo limefanikiwa kupunguza vifo vinavyosababishwa na ugonjwa huo kwa asilimia 33 katika kipindi cha miaka 10 iliyopita alisema.

Kwa upande wake Rais Jakaya Kikwete alisema bara hilo, linaongoza kwa vifo vinavyotokana  na ugonjwa huo kwa asilimia 89 na kuwa na wagonjwa kwa asilimia 83.

“Tukikusanya nguvu za pamoja  naamini tunaweza kufanikiwa. Tumeaanza vizuri nguvu za pamoja zitatuwezesha kufatuta vifaa pamoja ili kila  nchi viweze kupelekwa.

Alisema kupitia ALMA wamefanikiwa kutoa  vyandarua  bure  milioni 400.

Wakati huo huo Rais Kikwete alisema Tanzania itaendelea  kutoa ushirikiano na ALMA ili kufikisha malengo ya kupambana na ugonjwa huo.

Katibu Mtendaji wa ALMA, Joe Pumaphi alisema dola za Marekani bilioni 12 hutumika kila mwaka katika mapambano dhidi ya ugonjwa huo. Huku akihoji ni kwanini fedha hizo ziendelee kutumika.

Aidha Waziri wa Afya na Ustawi wa Jamii, DK. Hussein Mwinyi alisema  nchini Tanzania ugonjwa huo bado unaongoza kwa kusababisha vifo vya mama wajawazito na watoto.   Hivyo kesi zinazoripotiwa ni za watu milioni 12 na vifo watu 60,000 hadi 80,000 kwa mwaka.

Alisema Tanzania imefanikiwa kutokomeza ugonjwa huo kwa asilimia 50 kwa utoaji  wa vyandarua vilivyo na dawa bure kwa watoto walio na umri wa chini ya miaka mitano milioni tisa na kaya milioni 17.6.

Alisema changamoto iliyopo ni kuwa na uwezo wa kununua dawa na vyandarua kwa kutumia fedha za ndani.

Katika hatua nyingine Dk. Mwinyi alisema serikali itaendelea  kusimamia uuzaji wa dawa mseto ili kuhakikisha zinapatikana kwa bei inayostahili.