NAIBU WAZIRI TAMISEMI KASSIMU MAJALIWA AWATAKA MAAFISA ELIMU KUACHA LUGHA CHAFU KWA WALIMU"Wanadaiwa kuwakatisha tamaa walimu katika kazi zao"

Naibu waziri wa Tamisemi Bw.Kassim Majaliwa amewataka maafisa elimu nchini kujiepusha na lugha chafu  kwa walimu kwakuwa imebainika kuwa wamekuwa wakiwakatisha tamaa baadhi ya walimu na kushindwa kutekeleza majukumu yao ipasavyo.

Akizungumza katika majumuisho ya ziara yake mjini Tabora Bw.Majaliwa alisema amekuwa akipokea malalamiko mengi ya walimu dhidi ya maafisa elimu ambao wamekuwa na matamshi yasiyoridhisha na kuwafanya baadhi ya walimu waione ngumu kazi ya ualimu hatua ambayo pia inapunguza rasilimali ya uwajibikaji  nchini.

Katika mkutano huo wa majumuisho ya ziara yake uliofanyika Chuo cha Ualimu Tabora,Naibu waziri Majaliwa akawageuzia kibao pia watumishi wa halmashauri waliokatika ofisi za Masijala kuacha tabia ya usumbufu kwa walimu wenye shida mbalimbali na hasa wakati wa kufuatilia haki stahili zao jambo ambalo alidai kuwa limeota mizizi kwa baadhi ya halmashauri.

Kwaupande mwingine sambamba na kubainisha kuwa Serikali ipo katika mchakato wa kuboresha makazi ya walimu na maslahi yao kwa ujumla,Naibu waziri Majaliwa alitumia fursa hiyo pia kuwataka madiwani waieleze jamii kuishi vizuri na kuwapa ushirikiano walimu ambao watapangiwa kufanya kazi katika shule zilizopo kwenye maeneo yao.

“Ndugu zangu madiwani tafadhari nawaombeni hebu jaribuni mzungumze na jamii huko kwenye maeneo yenu kwani imezuka tabia ya kuwachezea walimu kwa kuwalimisha usiku kucha,kuwalaza barabarani hadi asubuhi…..jamani hii ni aibu”alisema Naibu waziri huyo akimaanisha vitendo vya kishirikina wanavyodaiwa kufanyiwa baadhi ya walimu hasa walioko vijijini.

Naibu waziri Majaliwa ambaye alifanya ziara yake katika wilaya zote za mkoa wa Tabora na kukagua baadhi ya shule,kuongea na walimu pamoja na madiwani na wadau wengine wa elimu pia aliwataka kuwa na ushirikiano wa dhati katika harakati za kusimamia masuala ya elimu kwa shule za msingi na sekondari.