WANAFUNZI WAWILI SEKONDARI YA BOMBAMZINGA WAFUKUZWA SHULE"Walimpiga mwalimu na kutishia kumuua,waandika matusi majengo yote ya shule"

Mwanafunzi wa Shule ya Bombamzinga akionesha dharau mbele ya wazazi na wajumbe wa bodi ya Shule hiyo hali iliyofanya hata baadhi ya wanafunzi wenzake wamshangae.

Baadhi ya kundi la wanafunzi wa shule hiyo ambao wanatuhumiwa kujihusisha na vitendo viovu na hasa kutishia kuwapiga walimu na wanafunzi wenzao

Wajumbe wa bodi ya shule wakiwa na baadhi ya wazazi wa watoto hao watukutu wakijaribu kutafuta suluhu

Mkuu wa Shule ya sekondari Bombamzinga Bw.Victor Nkana.

Kikao cha bodi ya shule ya sekondari ya Bombazinga iliyoko manispaa ya Tabora kimeridhia kufukuzwa shule wanafunzi wawili wa kidato cha pili Masoud Seleman na Daniel Fares kwa kuwapiga na kutishia kuwaua walimu wa nidhamu na ulinzi katika shule hiyo.

Ilielezwa katika kikao hicho kilichohudhuriwa pia na baadhi ya wazazi wa wanafunzi watovu wa nidhamu kuwa, mwanafunzi huyo Masoud Seleman ambaye ni maarufu kwa jina Gadaf mbali na kumtishia kumuua mwalimu huyo wa nidhamu Bw.Majaliwa Damiani,amekuwa na vitendo vya kuwapiga baadhi ya wanafunzi na kuwasababishia majeraha huku mwanafunzi Daniel Fares alimpiga ngumi mwalimu wa ulinzi Bw.Kategile na kumsababishia maumivu.

Sambamba na hilo maelezo yaliyotolewa na mkuu wa shule hiyo ya sekondari ya Bombamzinga Bw.Victor Nkana yaliweka bayana katika kikao hicho kuwa Mwanafunzi huyo Masoud(Gadaf)amekuwa ni mtovu wa nidhamu tangu alipoingia shuleni hapo yeye pamoja na wanafunzi wengine wapatao thelathini.

Aidha kwa upande mwingine alieleza kuwa Masoud imethibitika kuwa mbali na uvutaji bangi amekuwa akiandika matusi katika karibu majengo yote ya shule hiyo na kusababisha uongozi wa shule kuingia gharama ya kupaka rangi majengo ya shule nzima.

Hata hivyo pamoja na mwanafunzi huyo kubainika kufanya uovu huo na kuomba pesa ya bhangi kwa nguvu kwa wapita njia kwa kushirikiana na baadhi ya vijana wengine ambao si wanafunzi wa shule hiyo,uongozi wa shule ulimwita mzazi wa Masoud ili kumweleza uovu anaoufanya Masoud lakini mzazi hakuwa tayari kufika shuleni hapo.

Kwaupande mwingine Masoud Seleman akiwa na wanafunzi wenzake wapatao kumi na watano wakiwa na silaha marungu na visu, walivamia jengo la utawala shuleni hapo kwa lengo la kutaka kumkomboa mwenzao aliyekuwa anatumikia adhabu yake ya kufanya usafi kwenye jengo hilo la utawala.

Bodi ya shule ya Bombamzinga imetoa onyo kali kwa wanafunzi wapatao thelathini watovu wa nidhamu wakiwemo washirika wenza wa Masoud mbele ya mwakilishi wa Afisa Elimu mkoa wa Tabora Bw.Alfred Kafuku,kutorudia makosa wanayoyafanya wakiwa shuleni na hata nje ya Shule.

Mbali na hivyo bodi imeadhimia mbele ya baadhi ya wazazi kuwa endapo kama kuna mwanafunzi atarudia makosa hayo atafukuzwa shule.