POLISI WANAWASHIKILIA TISA KWA MAUAJI YA MWENYEKITI WA HALMASHAURI YA UYUI"Zimetumika mbinu za kisayansi kuwakamata,wenyewe wamekiri kuhusika,walipewa pesa kutekeleza unyama huo"

Kamanda wa Polisi mkoa wa Tabora ACP Anthony Rutha akiwaonesha waandishi wa habari mtambo wa kutengenezea bunduki za kienyeji zinazotumika katika shughuli za ujambazi mkoani Tabora na mikoa jirani.

Baadhi ya vidhibiti zikiwemo simu za marehemu Mh.Mashaka Kalyuwa  pamoja na silaha zinazodaiwa kutumika kufanya mauaji hayo.

 

Jeshi la Polisi mkoani Tabora linawashikilia watu tisa kwa tuhuma za kuhusika na mauaji ya aliyekuwa mwenyekiti wa Halmashauri ya wilaya ya Uyui Mh.Mashaka Kalyuwa.

Kamanda wa Polisi mkoa wa Tabora ACP Anthony Rutha alisema  tukio la mauaji hayo lilitokea  mnamo tarehe 2/3/2012 majira ya saa moja na nusu usiku ambapo watuhumiwa hao tisa kila mmoja kwa nafasi yake walihusuka kufanya mauaji hayo katika kata ya Ipuli manispaa ya Tabora.

Aidha kamanda Rutha alifafanua mbele ya waandishi wa habari ofisini kwake leo hii asubuhi kuwa watuhumiwa wakiwa na silaha mbalimbali bunduki za kienyeji zinazotumia risasi za Shortgun siku hiyo walivamia nyumbani kwa marehemu Mashaka huko Ipuli na kumkata kwa panga kichwani na baadaye  kumpiga risasi  iliyosababisha kifo chake.

Kamanda  Rutha ameyataja majina ya watuhumiwa waliohusika na mauaji hayo kuwa ni Omela Nchonji(40) mkazi wa Misole,Mathias Lubiza Sumuni(38)mkazi wa Kahama,Paschal Nkinga(43)mkazi wa Nkinga Igunga,Masoud Said Juma(41)mkazi wa kidatu Ipuli,Athuman Juma(30)mkazi wa kidatu chini Ipuli,Paul Magale(22)mkazi wa Kahama,Mihayo Stephano(28)mkazi wa Kiloleni,King Masanilo(31)mkazi wa Kiloleni na mwingine ni Haruna Athuman Kidaso(42)mkazi wa Mwanzaroad Tabora mjini.

ACP Rutha alisema baada ya uchunguzi wa awali ulibaini kuwa mauaji hayo yalifanywa na watuhumiwa hao kwa kisasi baina yao na Marehemu Mashaka.

Kwaupande mwingine Kamanda Rutha alisema watuhumiwa wamehojiwa na kukiri kuhusika na mauaji hayo huku akitumia fursa hiyo kuwashukuru wananchi wa Tabora kwa ushirikiano wao katika kufanikisha kukamatwa kwa watuhumiwa hao ambao watafikishwa mahakamani kujibu tuhuma zinazowakabili.