MWANDISHI WA HABARI WA CHANNELTEN CHARLES HILILA AFARIKI DUNIA

Aliyekuwa Mwandishi wa habari wa Kituo cha Channelten Bw.Charles Hilila amefariki dunia  saa saba usiku katika Hospitali ya mkoa wa Shinyanga ambako alikuwa amelazwa kwa ajili ya kupatiwa matibabu ya homa ya Malaria iliyokuwa ikimsumbua kwa muda wa siku chache zilizopita...MUNGU AILAZE MAHALI PEMA PEPONI ROHO YA MAREHEMU CHARLES HILILA ,AMENI

KADA WA CCM EMMANUEL MWAKASAKA AOKOA MAISHA YA MWANACHAMA WA CHADEMA

Mwanachama wa Chadema  Bi.Esther Moses  Ngoho mkazi wa kata ya Kakola manispaa ya Tabora ambaye amepatiwa msaada wa matibabu  na Kada wa CCM Bw.Emmanuel Mwakasaka ambaye alisema yuko tayari kumsaidia mama huyu ambapo aliweka ahadi ya kumpeleka katika hospitali yoyote duniani ilimradi aweze kupona magonjwa yanayomsumbua ambayo yamesababisha hali yake kuwa mbaya zaidi.

Baada ya Kada huyo wa CCM Emmanuel Mwakasaka  kuonesha moyo wa uzalendo wa kuwasaidia wananchi baadhi ya viongozi wa Chadema kata ya Kakola walivutika na kuamua kujiunga na CCM na wengine walidiriki kurejesha hata bendera za Chadema pamoja na kadi za Chama hicho.

Mmoja kati ya waliokuwa viongozi wa Chadema wakikabidhi bendera na kadi zao na kujiunga na CCM.

Mwenyekiti wa jumuiya ya Umoja wa vijana wa CCM wilaya ya Tabora mjini akionesha bendera ya Chadema iliyorudishwa na viongozi wa Chadema.

MGAMBO WAWAKAMATA CHANGUDOA SINZA

MACHANGUDOA WANAOFANYA BIASHARA YAO SINZA WAKAMATWA-KUMRADHI KWA UKALI WA PICHA.

Mgambo wa jiji la Dar es Salaam wakiwa katika zoezi la kuwakamata Madada wanaofanya biashara ya kuuza miili yao wajulikanao kama Machangudoa katika eneo la Sinza. Picha mbalimbali zikionyesha namna walivyokuwa wakipakiwa ndani ya Gari tayari kwa kupelekwa katika vyombo vya sheria.

WAUMINI WA DINI YA KIKRISTO WACHANGIA UJENZI WA MSIKITI WA MUHAAJIRINA TABORA,MWAKASAKA ATOA ZAIDI YA SHILINGI MIL.MOJA

Mwanasheria wa kujitegemea na kada wa Chama cha Mapinduzi mkoani Tabora Bw.Emmanuel Mwakasaka akizungumza wakati wa sherehe za Maulidi zilizofanyika Madrasat Muhaajirina ambapo Mdau huyo alichangia zaidi ya shilingi Milioni moja katika harambee ya ujenzi wa Msikiti wa Muhaajirina uliopo kata ya Malolo manispaa ya Tabora.

Jengo la Msikiti wa Muhaajirina

Sheikh wa wilaya ya Tabora Sheikh Ramadhani Rashidi akimpongeza  Bw.Emmanuel Mwakasaka baada ya kupokea mchango wake wa shilingi mil.moja

Baadhi ya kinamama wa Kiislamu wakiwa katika sherehe hizo za Maulid

JITIHADA ZA MKUU WA MKOA TABORA ZAANZA KUWANUFAISHA VIJANA

Na Mwandishi wetu, Sikonge

JITIHADA za mkuu wa mkoa wa Tabora Bi. Fatma Mwassa kuhakikisha mkoa huo unakuwa na kituo cha kisasa cha mafunzo ya ujasiriamali kwa vijana ili kuboresha maisha yao zimeanza kuzaa matunda baada ya kituo hicho kuanza kutoa mafunzo mbalimbali kwa vijana kutoka maeneo mbalimbali katika wilaya ya Sikonge mkoani humo.

Hayo yalibainishwa jana katika ziara maalumu iliyofanywa na mkuu huyo wa mkoa akiambatana na watendaji wakuu wa serikali ya mkoa na halmashauri ya wilaya ya Sikonge walipotembelea kituo hicho na kushiriki kazi mbali mbali pamoja na vijana walioko katika kambi hiyo.

Katika ziara hiyo Bi. Mwassa na wasaidizi wake walishuhudia shughuli mbalimbali zilizofanywa na vijana hao kwa ustadi mkubwa katika kituo hicho ikiwemo ubunifu wa kutengeneza vitu mbalimbali, utengenezaji na utundikaji wa mizinga ya nyuki, ujenzi wa mabanda ya kufugia nyuki, ufyatuaji matofali aina ya ‘interlock’, bustani za mboga mboga katika mtindo wa ‘green-house’, useremala na mengineyo.

Akiwa katika kituo hicho ambacho kutokana na umaarufu wake vijana hao wamekipa jina la ‘TULU GREEN CITY’, Mwassa alisema kuwa mpaka sasa vijana hao wamefanya mambo makubwa kwa mda mfupi  jambo linaloashiria mwanzo mzuri huku akiwapongeza wataalamu wote wanaowasaidia vijana hao.

Aidha, Mwassa aliongeza kuwa vitu vyote vitakavyotengenezwa na vijana hao vitakuwa vikiuzwa kwa watu mbalimbali ikiwemo halmashauri zote za mkoa huo ili kuwanufaisha zaidi vijana hao na kwa kuanzia tayari tumeshapokea oda toka sehemu mbalimbali za kununua matofali hayo na vifaa vingine vitakuwa vikiuzwa katika maonesho ya kibiashara.

Aidha , Mwassa alibainisha kuwa Tanzania tumeamua kuingia kwenye mfumo wa matokeo makubwa sasa  unaojulikana kwa jina la ‘BIG RESULTS NOW’  lengo likiwa kuwapa vijana ujuzi katika nyanja mbalimbali ili wawe chachu ya maendeleo kupitia uzalishaji na utengenezaji wa bidhaa kadhaa wa kadha sambamba na kuwafundisha vijana wenzao.

Mwassa alibainisha kuwa nguvu kazi ya vijana hao imeanza kuiva, kazi zinafanyika kwa uhakika na matumaini juu ya vijana hao ni makubwa, na kuongeza kuwa kuanzia mwezi Desemba mwaka huu wanatarajia kuanza ufugaji, kilimo cha mtama, alizeti, viazi vitamu, mbogamboga na mazao mengine yanayostahimili ukame sambamba na ujenzi wa jengo la utawala na karakana.

 ‘Hii ni fursa muhimu sana kwa vijana wetu wasiipoteze, naomba wana Tabora waniunge mkono ili ndoto zangu za maendeleo kwa vijana na mkoa kwa ujumla zitimie na hatimaye tubadilishe uzalishaji katika mkoa huu’, alisema.

Akizungumza na waandishi wa habari katika kituo hicho, Mwenyekiti wa halmashauri ya wilaya ya Sikonge Robert Kamoga, alipongeza wazo la kuanzishwa kituo hicho katika wilaya hiyo na kubainisha kuwa kero za ajira kwa vijana sasa zitapungua kwa sababu vijana hao watajiajiri wenyewe na kuajiri vijana wenzao, hivyo akatoa wito kwa jamii kutembelea kituo hicho ili kujifunza.

Naye Mkurugenzi mtendaji wa halmashauri ya wilaya ya Sikonge Shedrack Mhagama, alisema kuwa wamedhamiria kuwawezesha vijana kupata ujuzi utakaowawezesha kutengeneza ajira zao wenyewe ili kujiongezea kipato kupitia uzalishaji mali, ufugaji wa ng’ombe, mbuzi na kuku, kilimo na ujenzi, hivyo akawashauri wazazi wawaruhusu vijana wao wajiunge na kituo hicho.

Vijana walioko katika kituo hicho Remi Alisemi (22) na Raymond Peter (23) wakizungumza mbele ya mkuu wa mkoa, walitoa shukrani zao kwa kuanzishwa kijiji hicho cha mfano na kusema kuwa kimekuwa mkombozi wa maisha yao kwani awali walikuwa wazururaji tu huku wengine wakiwa wavuta bangi, vibaka, wabwia unga na hawakuwa na ujuzi wowote ule tofauti na walivyo sasa.

SERIKALI YAPONGEZA MRADI WA PROSPER

Na Juma kapipi - Kaliua

SERIKALI wilayani Kaliua imepongeza jitihada za kutokomeza utumikishwaji watoto wadogo katika mashamba ya tumbaku na kazi za nyumbani zinazofanywa na mradi wa PROPSER kwa kuwa tatizo hilo limekuwa kikwazo kikubwa kwa watoto waliowengi mkoani Tabora kutopata fursa ya kwenda shule.

Pongezi hizo zimetololewa na mkuu wa wilaya ya Kaliua, Savery Maketta, katika kilele cha maadhimisho ya siku ya kupinga utumikishwaji  watoto duniani iliyofanyika  juzi katika kijiji cha Igwisi wilayani hapa ambapo pamoja na mambo mengine alisifu jitihada mbalimbali zinazoendelea kufanywa na taasisi ya Winrock International kupitia mradi wake wa PROSPER unaotekelezwa katika mkoa wa Tabora.

Akizungumza katika sherehe hiyo iliyohudhuria na wanakijiji kutoka vijiji vya Igwisi, Nsimbo, Mahalaja na Mpandamlowoka, mkuu wa wilaya kupitia  mwakilishi wake, Josephati Brown, ambaye ni Afisa Tarafa wa wilaya ya Kaliua alisema kuwa mradi wa PROSPER umekuwa mkombozi kwa maelfu ya watoto mkoani Tabora kwani jitihada zake za kuendelea kupinga kila namna ya utumikishwaji zimezaa matunda.

Mkuu huyo wa wilaya alisema kuwa wimbi la watoto wa mitaani limeendelea kuongezeka kwa kasi kubwa katika maeneo mbalimbali hapa nchini huku watoto hao wakitumikishwa katika kazi za nyumbani,mifugo  na mashambani kwa ujira mdogo, jambo linalohitaji kupingwa vikali na serikali, wazazi, taasisi na wadau wote wa maendeleo.

Aidha mkuu huyo alisema jitihada zinazofanywa na taasisi hii zimefanikiwa kurejesha watoto zaidi ya 1500 shuleni baada ya wazazi wao kushindwa  ambapo kati yao 600 wamepewa mahitaji yote ya shule na wanaendelea na masomo na wengine wapatao 850 wamesajiliwa katika mpango maalumu wa  elimu baada ya muda wa masomo na michezo.

Akisoma taarifa fupi katika maadhimisho hayo  Mkurugenzi mtendaji wa Mradi wa PROSPER, Mary Kibogoya alisema  kuwa kwa kipindi cha mwaka 2012 kupitia mradi huo, watoto zaidi ya 2194 wavulana wakiwa 1164 na wasichana 1030 wameondolewa katika utumikishwaji huo uliokuwa ukifanywa na wazazi na walezi  ambao hawaoni faida ya kuwapeleka watoto wao shule na badala yake huwatumikisha katika mashamba ya tumbaku.

Alifafanua kuwa mradi wa PROSPER ambao unatekelezwa katika vijiji 20 unafadhiliwa na Umoja wa wadau wa zao la tumbaku Duniani ELCT na kutekelezwa na asasi tatu za Winrock International,TDFT na TAWLAE ambapo unalenga kuzuia na kuwatoa watoto 7,800 kwenye utumikishwaji katika mashamba ya tumbaku.

‘Hatari za kuacha watoto wazagae mitaani ni kubwa, na mradi huu umekuwa na juhudi nyingi za kuokoa maisha ya watoto hao katika wilaya za Sikonge na Urambo hapa mkoani Tabora , lakini nasikitika kwamba baadhi  ya wazazi waliowengi  bado hawajabadilika, naomba ieleweke wazi kwamba suala la kupeleka watoto shule ni la lazima na si ombi’, alisema.

Awali, wakisoma risala yao katika sherehe hiyo,  watoto wa shule za misingi waliiomba serikali, wazazi na taasisi zinginezo zisaidie kukomesha aina zote za utumikishwa wa watoto hapa nchini kwani wanapoteza haki yao ya msingi ya kupata elimu na hivyo kuzidi kutumikishwa au kubakia kuwa ombaomba mitaani.                           

BOMU LALIPULIWA KWENYE MKUTANO WA CHADEMA ARUSHA,WATU KADHAA WAHOFIWA KUFA.

WAFUASI NA MASHABIKI WA CHADEMA KATIKA MKUTANO WA KUFUNGA KAMPENI ZA UDIWANI SOWETO JIJINI ARUSHA .

WATU wawili wanahofiwa kupoteza maisha na wengine kujeruhiwa kutokana na mlipuko wa bomu lililolipuka kwenye mkutano wa CHADEMA katika eneo la Soweto, kata ya Kaloleni jijini Arusha, wakati wa kufunga kamp

eni za uchaguzi wa madiwani katika maeneo ya jiji hilo.

Waliojeruhiwa wamekimbizwa katika hosp
itali ya Seliani na Mount Meru.

Bomu hilo linaelezwa kuwa lilitupwa kwenye mkusanyiko wa watu, lilipuka mwendo wa saa kumi na mbili na robo jioni wakati mkutano huo ulipokuwa umekwisha na shughuli ya kukusanya michango ikiendelea.

Viongozi wa juu wa CHADEMA, Freeman Mbowe na Godbless Lema walikuwepo na wameendelea kuwepo kwenye eneo baada ya mlipuko huo.

Polisi wapo katika eneo hilo wakijitahidi kutuliza ghasia lakini inasemekana upo upinzani mkubwa kutoka kwa wananchi wanaojaribu kuwafukuza, hali iliyowalazimu kupiga mabomu ya machozi na kukamata watu kadhaa wakiwemo viongozi wa CHADEMA.

ILANI: Baadhi ya picha zilizopachikwa hapo huenda zikagusa  hisia ya mtizamaji, tafadhali ikiwa huwezi kuvumilia kuona damu usibofye tarakimu zilizopo hapo chini kufungua picha zinazofuatia.

CHANZO http://mwanahabariuswazi.blogspot.com

 SEHEMU YA UMATI WA WAFUASI WA CHADEMA KATIKA MKUTANO HUO.WAHANGA WA TUKIO HILO

 

DAMU WANANCHI WAKIANGALIA DAMU ILIYOMWAGIKA KUTOKA KWA WAHANGA HAO.DAMU SAMBAMBA NA KANDAMBILI

GARI LIKIWA LIMEHARIBIWA

MUNDE AWAKOMBOA MAKATIBU U.W.T TABORA MJINI,ATOA MSAADA WA BAISKELI ZENYE THAMANI YA SH.MIL.3.75

Baadhi ya Makatibu kata wa U.W.T Tabora mjini wakijitayarisha kuondoka baada ya kukabidhiwa baiskeli zao kama chombo cha Usafiri watakachokitumia kuzunguukia wanachama wao ikiwa ni mkakati wa kukiimarisha CCM kupitia Jumuiya hiyo ya Umoja wa Wanawake ambapo baiskeli hizo zimetolewa na Mbunge wa Vitimaalum Mh.Munde Tambwe.

Mwenyekiti wa CCM wilaya ya Tabora manispaa Bw.Moshi Abraham maarufu Nkokota akikabidhi msaada wa baiskeli 25 aina ya Phoniex zenye thamani ya shilingi mil.3,750,000/=kwa makatibu kata wa UWT zilizotolewa na  Mbunge wa vitimaalum  mkoa wa Tabora Mh.Munde Tambwe kwa ajili ya kurahisisha shughuli za Jumuiya hiyo ya UWT.

"MARUFUKU KUWATUMIKISHA WATOTO KWENYE MASHAMBA YA TUMBAKU"-SERIKALI KALIUA

Baadhi ya watoto wa Shule ya msingi Igwisi ilyopo kijiji cha Igwisi wilayani Kaliua mkoani Tabora wakiandamana wakati wa maadhimisho ya siku ya kupinga ajira mbaya kwa watoto.

Hawa ni miongoni mwa watoto ambao hawajapata fursa ya kupata elimu ya msingi ambao wanaishi katika kijiji cha Igwisi wilayani Kaliua.

Mkurugenzi mtendaji wa Mradi wa Prosper Bi.Mary Kibogoya akisoma taarifa ya utekelezaji wa mradi huo ambao umelenga kuzuia  na kuwaondoa watoto wapatao 7,800 kwenye utumikishwaji katika mashamba ya tumbaku.

Watoto katika maadhimisho hayo waliimba nyimbo zilizohamasisha jamii kupambana na tatizo la ajira mbaya kwa watoto kwenye mashamba ya tumbaku.

Wakati wa maadhimisho hayo ngoma ya asili ya wenyeji wa Mkoa wa Rukwa ilitumbuizwa na baadhi ya kinamama na kusababisha maafisa wa Mradi wa Prosper na makampuni yanayojihusisha na ununuzi wa zao la tumbaku kuanza kucheza na kuwa kivutio kikubwa katika maadhimisho hayo.

Afisa tarafa ya Kaliua Bw.Josephat Brown ambaye alimwakilisha mkuu wa wilaya ya Kaliua katika maadhimisho hayo ambapo Serikali ilitoa tamko la kumchukulia hatua kali yeyote atakaye jihusisha na utumikishwaji wa watoto na kusababisha watoto kukosa fursa ya haki ya elimu.

MSANII WA BONGO FLEVA MKOANI TABORA "MAN FLEY"SASA ANAKUBALIKA KWA KAZI ZAKE

Msanii wa Bongo Fleva anayechipukia mkoani Tabora maarufu MAN FLEY alipopata  fursa ya kupanda jukwaani na  kuachia nyimbo yake moja siku ya mashindano ya Redds Miss Tabora 2013 katika ukumbi wa Frankman Hotel ambapo idadi kubwa ya mashabiki wameanza kumkubali kutokana na namna Msanii huyo anavyojituma katika kazi zake.

POLISI ZANZIBAR NA VIKOSI VYA SMZ KUFANYA MATEMBEZI YA AMANI

Na Mohammed Mhina, wa Jeshi la Polisi

Jeshi la Polisi Zanzibar Jumamosi Juni 15, 2013 litafanya matembezi (Route March) ya pamoja kati yake na Askari wa Vikosi vya SMZ.

Kamishna wa Polisi Zanzibar CP Mussa Ali Mussa, ameyataja makundi mengine yatakayoshiriki kwenye matembezi hayo kuwa ni pamoja na , Vikundi vya Mazoezi ya Viungo pamoja na Vikundi vya Ulinzi Shirikishi.

Amesema matembezi hayo ambayo yataanza saa 12.00 alfajiri siku hiyo, yataanzia kwenye Viwanja ya Polisi Ziwani na kuishia nje ya Uwanja wa Michezo wa Amani saa 3.00 asubuhi.

Kamishna Mussa amesema matembezi hayo yenye sura ya amani yatapokelewa na Mkuu wa Mkoa wa Mjini Maghari Unguja Bw. Abdallah Mwinyi Khamisi na washiriki wake watatoka katika mikoa mitatu ya Unguja.

Katika taarifa yake kwa vyombo vya Habari, Kamishna Mussa amewaomba wananchi wa mji wa Zanzibar na Viunga vyake wameombwa kufika nje ya Uwanja wa Amani kuanzia saa 2.00 asubuhi ili kupata ujumbe utakaotolewa siku hiyo.

Viongozi mbalimbali kutoka Vyombo vya Ulinzi na Usalama Zanzibar watahudhuria katika mapokezi hayo.

Aidha Waandishi kutoka vyombo mbalimbali wa Habari, wameombwa kuhudhuria ili kusaidia kutoa elimu kwa umma juu ya yale yote yatakayoelekezwa kwa manufaa ya Taifa letu.

   IMETOLEWA NA INSP. MOHAMMED MHINA, AFISA HABARI MKUU WA JESHI LA POLISI ZANZIBAR.

0715 886488, 0784 886488, 0767 886488

NZEGA BINGWA WA SOKA MASHINDANO YA UMITASHUMTA TABORA

 Mabingwa soka kwa mashindano ya shule za msingi mkoa wa Tabora ni timu ya wilaya ya Nzega wakiwa wamebeba kombe.

POLISI TABORA WAKAMATA BANGI YENYE THAMANI YA SHILINGI MIL.68

Kamanda wa Polisi mkoa wa Tabora  ACP Peter Ouma akiangalia magunia ya bangi yaliyokamata Wilayani Nzega ambayo yalikuwa yakisafirishwa,mzigo huu ulikuwa na thamani ya zaidi ya shilingi mil.68.

TUHUMA ZA UBAKAJI ZAMPONZA!!!

Mtu alie sadikika kumbaka mtoto  wa umri wa miaka nane mkazi wa manispaa ya Iringa,  akipokea kichapo toka kwa wananchi wenye hasira   huku akisindikizwa kituo cha Polisi .

WATOTO TABORA WAPATA SEHEMU YA BURUDANI "AMOUR CHILDREN PARK IPO KILOLENI JIRANI NA GODOWN LA TFC"

Amour Children Park ipo eneo Kiloleni nyuma ya Godown la TFC,hapa watoto wanapata burudani za aina mbalimbali na huku wakiwa katika mazingira salama kabisa,

Huduma ya burudani zote hizi zinatolewa kila Ijumaa,Jumamosi na Ijumaa lakini pia kwa mtu yeyote anayetaka kusheherekea siku ya kuzaliwa kwake anakaribishwa na atalipia gharama nafuu kabisa.